İncəsənət

Ana səhifə

İncəsənət

Lənkəran teatrında yeni tamaşalar hazırlanır

29 yanvar 2010 19:06 (UTC +04:00)

Лənkəran. Ağəddin Babayev–APA. Nəcəf bəy Vəzirov adına Lənkəran Dövlət Dram Teatrında paralel olaraq bir neçə əsərin məşqləri gedir. Bu barədə APA–nın cənub bürosuna teatrın direktoru İslam Həsənov мялумат verib.

Onun sözlərinə görə, yaradıcı kollektiv məşhur qırğız yazıçısı Çingiz Aytmatovun “Gün var əsrə bərabər” romanının motivləri əsasında səhnələşdirilmiş “Manqurt” tamaşası üzərində ciddi işə başlayıb. Əsərə quruluşu Hüseyn Ərəblinski adına Sumqayıt Dövlət Musiqili-Dram Teatrının baş rejissoru, respublikanın əməkdar artisti Firudin Məhərrəmov verir. Bütün dövrlərlə səsləşən və daim aktual olan bu bəşəri əsərin musiqi tərtibatçısı bəstəkar Sərdar Fərəcov, quruluşçu–rəssamı Mustafa Mustafayevdir. Əsas rolların ifası respublikanın əməkdar artisti Təvəkkül Əliyevə, aparıcı aktyorlardan Əlibala Əsgərova, Allahverən Babayevə, Qızılgül Quliyevaya, Niftulla Əsgərova də digərlərinə həvalə olunub.

Teatrda stolüstü məşqləri gedən digər bir tamaşa tatar yazıçıları Süleyman və Həmdiyyə Lətipovların “Kral və əks-səda“ əsəridir. Tamaşanın quruluşçu-rejissoru Adil Zeynalov, quruluşçu-rəssamı Məzahim Qurbanov, musiqi tərtibatçısı isə İlqar Əliyevdir. Tatar xalq nağılları əsasında qələmə alınan və əsas mövzusunu sülh uğrunda mübarizə, dostluq və mehribanlıq təşkil edən bu səhnə əsərinin yaz tətili üçün balaca tamaşaçıların mühakiməsinə vermək nəzərdə tutulub.

Direktorun sözlərinə görə, teatrın repertuar planına müvafiq olaraq bu il burada həmçinin məşhur ingilis dramaturqu Vilyam Şekspirin ”Kral Lir”, rus dramaturqu Qriqori Qorinin “Herostratı unudun” və yazıçı-dramaturq Kamran Nəzirlinin “Şeytanın işığı” əsərlərini də tamaşaya qoymaq nəzərdə tutulub.