İncəsənət

Ana səhifə

İncəsənət

Azərbaycan Dövlət Musiqili Komediya Teatrının aktrisası Lütfiyyə Səfərova ağır vəziyyətdə xəstəxanaya yerləşdirilib

12 fevral 2010 09:51 (UTC +04:00)

Bakı. Ülkər Qasımova-APA. Azərbaycan Dövlət Musiqili Komediya Teatrının aktrisası, "Şirbalanın ilk məhəbbəti" filmində yaratdığı Nazlı obrazı ilə yaddaşlarda qalan Lütfiyyə Səfərova ağır vəziyyətdə 2 saylı Əfəndiyev adına xəstəxanaya yerləşdirilib. Bu barədə APA-ya məlumat verən xəstəxananın əsəb şöbəsinin müdiri Yusif İsmizadə deyib ki, 68 yaşlı aktrisa fevralın 6-da orta ağır vəziyyətdə əvvəlcə reanimasiya şöbəsinə yerləşdirilib: “Bir neçə gün reanimasiyada saxlanıldıqdan sonra bizim şöbəyə keçirdilər. Hazırda o əsəb şöbəsində ciddi müalicə alır və vəziyyəti orta ağırdır. Ümumiyyətlə Lütfiyyə xanımın psixoloji durumu yaxşı deyil, yəni psixoloji baxımdan ciddi problemləri var. Ümumiyyətlə, Lütfiyyə xanımda yaşla əlaqədar olaraq şəkərli diabet, hipertoniya, beyin-qan dövranın pozğunluğu kimi ciddi xəstəlikləri də var”.

Şöbə müdirinin sözlərinə görə, aktrisa bir ay xəstəxanada müalicə olunacaq və müalicə kursu başa çatdıqdan sonra həkim nəzarətində saxlanacaq: “Bizim bütün heyət Lütfiyyə xanımın lazımı qayğı görməsi üçün səfərbər olub. Yemək və dava dərmanla təminat bizim üzərimizdədir. Yanına heç kim gəlib-getmir. Bu neçə gün ərzində onun yanına kiminsə gəldiyinin şahidi olmamışam. Halbuki bu cür xəstələrin yanında qohumlardan, yaxın adamlardan kimsə qalır və ona dayaq olur. Ancaq Lütfiyyə xanım gəldiyi gündən təkdir”. Y. İsmizadə onu da vurğulayıb ki, bu cür xəstələrin birdəfəlik müalicə olunması qeyri-mümkündür və buna illər tələb olunur.

Lütfiyyə Səfərovanın 45 ilə yaxın çalışdığı Azərbaycan Dövlət Musiqili Komediya Teatrının rəhbərliyi və kollektivi aktrisanın xəstəxanaya yerləşdirilməsindən xəbərdar olsalar da, hansı xəstəxanada müalicə olunmasından xəbərsizdirlər. Teatrdan APA-ya bildirilib ki, 2 ilə yaxındır Lütfiyyə xanım psixi pozğunluqdan ciddi əziyyət çəkir və bu səbəbdən də teatrdan ayrılıb.