İncəsənət

Ana səhifə

İncəsənət

Patrick Hallmann və Fəxriyyə Xələfova Bakıda yeni kolleksiyalarını nümayiş etdiriblər - FOTOSESSIYA

Patrick Hallmann və Fəxriyyə Xələfova Bakıda yeni kolleksiyalarını nümayiş etdiriblər - <font color=red>FOTOSESSIYA</font>

14 fevral 2010 16:41 (UTC +04:00)

APA-nın məlumatına görə, “Tonica Production” və “Buta Palace”in təşkil etdiyi moda nümayişi məşhur “Fashion TV”də göstəriləcək.

Moda göstərisində öncə azərbaycanlı modelyer Fəxriyyə Xələfovanın “Bahar” kolleksiyası nümayiş olunub. İlk dəfə təqdim olunan kolleksiyadakı geyimlərin hazırlanmasında eksklüziv parçalardan istifadə olunub.

Fəxriyyə Xələfova APA-ya açıqlamasında moda nümayişində hazırladığı geyimlərin parçasının da müəllifinin özü olduğunu deyib: “Bu kolleksiyamın digər kolleksiyalardan fərqi və yenilik ondadır ki, bütün parçaları özüm yaratmışam. Yəni tək bu geyimlər yox, eyni zamanda geyimlərin hazırlandığı parçaları mənə məxsusdur. Bu geyimlərin və parçaların təkrarı yoxdur. Çox maraqlı kolleksiya təqdim etdim və yüksək səviyyədə qarşılanmasından da çox məmnunam”.

Modelyer parça biznesinə başlamaq niyyətində olduğunu da açıqlayıb: “İstərdim ki, öz brendimin adı ilə parçalarımı satışa çıxarım. Birinci ətriyyatdan başladım, indi isə böyük arzum var ki, geyim makamın da satışını təşkil edim. Bu satışı isə tək ölkədə yox, beynəlxalq səviyyədə həyata keçirmək niyyətindəyəm”.

F. Xələfova həm özünün, həm də Patrick Hallmanın kolleksiyasının Azərbaycan modelləri tərəfindən təqdim olunduğunu deyib: “Əgər istəsəydim “Fashion TV”-dən modelləri bura gətirə bilərdik. Bu heç də problemi deyil. Ancaq mənim istəyim odur ki, Azərbaycan modelləri beynəlxalq arenaya çıxsınlar. Onları biz tanıtmasaq, bunu bizim əvəzimizə kim edəcək? Bu çox vacib məsələdir. Bizim modellər heç də digər ölkələrin modellərindən geri qalmırlar”.

Azərbaycanlı modelyerin sözlərinə görə, təşkil edilən bu tədbir yaxın vaxtlarda məşhur “Fashion TV”də nümayiş olunacaq. Bu tədbiri işıqlandırmaq üçün isə “Fashion TV”-nin çəkiliş qrupu Bakıya gəlib.

Onu da vurğulamaq yerinə düşər ki, Patrick Hallmann hava şəraiti ilə əlaqədar Azərbaycana gələ bilməyib. Ancaq Patrick Hallmannın “2010 -2011 qış və yaz kolleksiyası”nın nümayişi yüksək səviyyədə baş tutub. Nümayişdən sonra isə Patrick Hallmannla şərik olan qardaşı Fredrick Hallmann səhnəyə çıxıb və daha sonra azərbaycanlı Fəxriyyə Xələfova ilə görüşüb.

Tədbirdə Fəxriyyə Xələfovanın istehsal etdiyi “Nuray” ətriyyat kolleksiyasının da nümayişi və satışı təşkil olunub. “Nuray” ətirləri 50 manata satışa çıxarılıb.

Nümayişdən sonra təşkilatçı “Tonica Production”un təşəbbüsü ilə Bakıya dəvət olunmuş dj Dim Chris və Mc Ania maraqlı proqramla çıxış ediblər.