İncəsənət

Ana səhifə

İncəsənət

“Ruhların qovuşan yeri” adlı çoxseriyalı bədii filmin çəkilişləri yekunlaşmaq üzrədir

06 mart 2010 03:44 (UTC +04:00)

Bakı-APA. “Artist” kino şirkətinin şəxsi büdcəsi hesabına və bir neçə yardım sevər şəxsin dəstəyi ilə ərsəyə gələn “Ruhların qovuşan yeri” adlı çoxseriyalı bədii filmin çəkilişləri yekunlaşmaq üzrədir. Bu barədə APA-ya “Artist” kino şirkətinin icraçı prodüseri və mətbuat xidmətinin rəhbəri Elvin Əhməd məlumat verib.

Onun sözlərinə görə Samir Qulamovun “Yol” romanının motivləri əsasında çəkilən filmdə Daxili İşlər Nazirliyinin bir çox arxiv materiallarından istifadə olunub.

Oxşar hadisələr və real faktlar əsasında çəkilən çoxseriyalı bədii filmin rejissoru Samir Qulamov, operatoru Şahmar Qəhrəmanov, bəstəkarı isə Gülçöhrə Babayeva və Tərlan Dühandır.

Ssenarisi 2006-cı ildən hazır olan filmin çəkilişlərinə 2009-cu ilin fevral ayından start verilib.

«Çəkilişlər Bakı, Sumqayıt, İmişli, Neftçala, Quba, Dubay və Mahaçqala şəhərlərində aparılıb.

Filmdə azərbaycanlı, türk və dağıstanlı aktyorlar çəkiliblər. Rejissor filmdə tanınmış simalara üstünlük verməməsinin səbəbi film sənayesinə yeni və maraqlı simaları gətirmək niyyətidir.

Psixoloji kriminal janrında çəkilən filmdə baş rolları Mahir Cananov və İlhamə Bədəlova ifa edirlər.

Film hər biri 42 dəqiqə olmaqla 20 seriyadan ibarətdir.

Film Hüquq Mühafizə orqanları əməkdaşlarının cinayətkarlığa qarşı apardıqları amansız mübarizədən, sovet dönəmindəki atılmış, kimsəsiz uşaqlara göstərilən qayğısızlıqdan və kriminal xarakter daşısa da iki fərqli düşüncəli şəxsin məhəbbətindən bəhs edir.

Filmin süjet xətti belədir: Hələ körpə ikən valideynləri tərəfindən uşaq evinə atılmış Aslan xüsusi cinayətkar qrup tərəfindən Rusiyaya qaçırılır. Aslan cinayətkar qrup tərəfindən sərrast atıcı kimi yetişdirilir. Peşəkar qatil kimi sifarişli qətllər törətməyə başlayır. Bu tip muzdlu qatillər körpəlikdən amansız və qəddar böyüdülür. Törətdiyi cinayətlərə görə Aslan, digər cinayətkar qruplar və İnterpol tərəfindən təxirəsalınmaz axtarışa başlanır.
Günlərin birində Aslanı yetişdirən cinayətkar qruplaşmanın rəhbəri Azərbaycandan qətl sifarişi alır. Sifariş Abdulla adlı narkotik alverçisini qətlə yetirməkdir. Qruplaşmanın rəhbəri sifarişi yerinə yetirmək üçün “Mao” ləqəbli Aslan Qədirovu Azərbaycana göndərir. Doğma şəhəri Bakıya yenicə gələn Aslan xüsusi xidmət orqanlarının əməliyyat tədbiri nəticəsində mühasirəyə düşür. Təsadüfən muzdlu qatil yaxınlıqdakı binaların birində yaşayan telejurnalist Rəna Zeynalovanın mənzilinə daxil olur. Bu təsadüfi görüş hadisələrin məcrasını dəyişir.

Filmdə təsvir olunan hadisələr 1985-2010-cu illəri əhatə edir.