İncəsənət

İncəsənət

Tiflis Heydər Əliyev adına Dövlət Azərbaycan Dram Teatrında yeni tamaşa oynanılıb

09 mart 2010 21:44 (UTC +04:00)

Tiflis. Nizami Məmmədzadə-APA. Bu gün Tiflisdə Heydər Əliyev adına Tiflis Dövlət Azərbaycan Dram Teatrında «Didro» adlı yeni tamaşa oynanılıb.

APA-nın Gürcüstan bürosunun məlumatına görə, yeni tamaşa gürcü yazıçısı Nodar Dumbadzenin «Əbədiyyət qanunu» və «Didro» əsərləri əsasında hazırlanıb. Tamaşanın rejissorları Turqay Vəlizadə və Aslan Məmmədovdur. «Didro» əsərində rolları da rejissor-aktyorların özləri oynayıblar. Əsəri şair Alxan Binnətoğlu tərcümə edib.

Teatrın müdiri Qoça Kapanadze APA-ya açıqlamasında bildirib ki, tamaşa gənc rejissorların təşəbbüsü ilə meydana gəlib: «Əsərdə yalnız iki aktyor oynayır. İstedadlı gürcü yazıçı-dramaturq Nodar Dumbadzenin «Didro» əsəri aktyorlarımızdan Turqay Vəlizadənin və Aslan Məmmədovun diqqətini cəlb edib. Onların əsər üzərində apardıqları iş mənim xoşuma gəldi. Ona görə də onların təşəbbüsünü bəyəndik. Gözəl tamaşa alındı. Tamaşa maraqlı süjet üzərində qurulub. Əsərdə kiçik və sadə adamların həyatı təsvir olunub. Onların sevgisi hər ikisini bir olmağa səsləyir. Tək adam heç nə edə bilməz. Əgər biz bir olmasaq dünya məhv olar. Əsər bu fikir üzərində qurulub. Rolları oynayan hər iki gənc çox istedadlı aktyorlardır. Bu mövsümdə üç dram əsəri hazırlamışıq. Bir həftədən sonra yeni bir əsərin tamaşası olacaq. Texniki cəhətdən imkanımız çox məhduddur. Hələlik 14 aktyorla çalışırıq. Eyni zamanda teatrın nəzdində biz studiya yaratmışıq. Burada 10 nəfər gənc aktyor qrupu təkmilləşir. Gələcəkdə onları da sıralarımıza dəvət edəcəyik. Hələlik isə gənc aktyorlara təcrübəli incəsənət işçisi Hidayət Hüseynov aktyorluq sənətinin sirlərini öyrədir. Hazırladığımız əsərləri Azərbaycanda da göstərmək fikrindəyik».