İncəsənət

İncəsənət

Ələsgər Ələkbərovun 100 və Leyla Bədirbəylinin 90 illik yubileyləri qeyd olunacaq

11 mart 2010 16:10 (UTC +04:00)

Bakı. Ülkər Qasımova – APA. Aprelin 2-də Azərbaycanın görkəmli kino və teatr aktyoru, SSRİ xalq artisti, dövlət mükafatı laureatı Ələsgər Ələkbərovun 100 illik yubileyi qeyd olunacaq. Dövlət Film Fondunun direktoru Cəmil Quliyevin APA-ya verdiyi məlumata görə, tədbirdə aktyorun həyat və yaradıcılığına nəzər salınacaq, onun oynadığı filmlərdən fraqmentlər nümayiş olunacaq. Eləcə də aktyorun yaradıcılığına həsr olunmuş foto-sərginin nümayişi nəzərdə tutulur.

Qeyd edək ki, Ə. Ələkbərov “Vulkan üzərində ev”, “Almaz”, “İsmət”, “Qara daşlar”, “Yeni horizont”, “Uzaq sahillərdə”, “Ögey ana”, “Böyük dayaq”, “Leyli və Məcnun” və digər filmlərdə yaddaqalan obrazlar yaradıb.

Aprelin 9-da isə Dövlət Film Fondunun təşkilatçılığı ilə Azərbaycanın görkəmli kino və teatr aktrisası, xalq artisti Leyla Bədirbəylinin 90 illik yubileyinə həsr olunmuş anım tədbirinin keçirilməsi planlaşdırılır. Muzey Mərkəzində baş tutacaq tədbirdə Leyla Bədirbəylinin filmlərindən maraqlı kadrlar göstəriləcək.

Xatırladaq ki, görkəmli aktrisa “Arşın mal alan”, “Dəcəl dəstə”, “Səbuhi”, “Dəli kür”, “Kişi sözü”, “Koroğlu”, “Dərviş Parisi partladır”, “Bizim küçə” və digər filmlərdə unudulmaz rollar canlandırıb.