İncəsənət

İncəsənət

Maqbet Bünyatov: “Milli Teatr gününün dövlət səviyyəsində qeyd olunmasını arzulayırıq”

27 mart 2010 10:28 (UTC +04:00)

Bakı. Ülkər Qasımova - APA. Bu gün bütün dünyada Beynəlxalq Teatr günü kimi qeyd olunur.

APA-nın məlumatına görə, 27 Mart - Beynəlxalq Teatr günü UNESCO-nun Beynəlxalq Teatr İnstitutunun təşəbbüsü ilə tarixə düşüb. Beynəlxalq Teatr İnstitutunun 1961-ci ildə Vyanada keçirilən IX konqresində qərara alınıb ki, hər il mart ayının 27-si Beynəlxalq Teatr günü kimi qeyd olunsun.

Beynəlxalq Teatr Günü ilə bağlı APA-ya açıqlama verən Azərbaycan Dövlət Akademik Milli Dram Teatrının direktoru Maqbet Bünyatov bu günün Azərbaycanda da qeyd olunduğunu bildirib: “Sözsüz ki, biz də öz növbəmizdə bu günü keçiririk və bir-birimizi təbrik edirik. Teatrın sərhədi olmur və teatr hər bir millətin güzgüsüdür. Ancaq bizim teatrımızın tarixi ilə bağlı Milli Teatr günü kimi qeyd etdiyimiz tarix martın 10-na təsadüf edir. Bu tarixi biz öz aramızda qeyd edirik, yəni bunun üçün xüsusi rəsmi fərman yoxdur. Tək mən yox, Azərbaycanın bütün teatr xadimləri Milli Teatr gününün rəsmi olaraq dövlət səviyyəsində qeyd olunmasını arzulayır. Ümidvaram ki, bu arzumuz həyata keçiriləcək və Milli Teatr günü rəsmi status alacaq”.