İncəsənət

İncəsənət

Alim Qasımov və Fərqanə Qasımovanın Heydər Əliyev Sarayında konserti olub - FOTOSESSİYA

Alim Qasımov və Fərqanə Qasımovanın Heydər Əliyev Sarayında konserti olub - <font color=red>FOTOSESSİYA </font>

10 aprel 2010 09:53 (UTC +04:00)

Bakı. Ülkər Qasımova – APA. Aprelin 9-da Heydər Əliyev Sarayında xalq artisti, muğam ifaçısı Alim Qasımov qızı Fərqanə Qasımova ilə növbəti konsert proqramı ilə çıxış edib. APA-nın məlumatına görə, 30 dəqiqə gec başlayan konsert anşlaqla keçib.

Alim Qasımov ənənəsinə sadiq qalaraq ifasını bu dəfə də yerdə əyləşərək təqdim edib. Xanəndə bir neçə muğam parçası oxuyandan sonra tamaşaçıları salamlayıb, “Çalışacağam ki, bu gününüz unudulmaz olsun”, söyləyib.

Daha sonra A. Qasımov qızı Fərqanə Qasımovanı səhnəyə dəvət edib. Onlar həm solo, həm də duet şəklində muğamlar oxuyublar. Konsertdə muğam ifaçılarını kamançada Rauf İslamov, tarda Zəki Vəliyev, nağarada Cavidan Nəbiyev, balabanda isə Rafael Əsgərov müşayiət ediblər.

Konsertdə yaşanan maraqlı məqamlardan biri də Təbrizdən məhz Alim Qasımovun konsertində iştirak etmək üçün Bakıya gəlmiş şair Xosrof Nəbatinin çıxışı olub. Alim Qasımov Xosrof Nəbatini səhnəyə dəvət edib, şair isə öz növbəsində xanəndəyə həsr etdiyi şeirini oxuyub. A. Qasımov Xosrof Nəbatinin də çox gözəl səsi olduğunu deyib.

1 saat 30 dəqiqə nəzərdə tutulan konsert tamaşaçıların istəyi ilə 2 saatadək uzanıb. Belə ki, konsert başa çatdıqdan sonra ayaqüstü alqışlarla yola salınan musiqiçilər, alqışların uzun müddət davam etdiyini görərək yenidən səhnəyə qayıdıblar. Bu hal iki dəfə yaşanıb. Xanəndələr tamaşaçıların istəyi ilə iki dəfə səhnəyə qayıdıb, konsertin vaxtına proqramdan kənar əlavələr ediblər.

Konsertin sonunda Alim Qasımovun nəvələri, eləcə də çoxsaylı tamaşaçılar xanəndələri gül dəstələri ilə təbrik ediblər. Konsertdə Azərbaycanın xalq artistləri Əlibaba Məmmədov, Ağaxan Abdullayev, bəstəkar Siyavuş Kərimi və bir çox tanınmış simalar da iştirak ediblər.

Qonaqlar arasında xarici vətəndaşların olması da diqqət çəkib.

Alim_Qasımov