İncəsənət

İncəsənət

Xalq artisti Yusif Muxtarov 69 yaşında dünyasını dəyişib

26 aprel 2010 11:09 (UTC +04:00)

APA-nın məlumatına görə, xalq artisti bu gün 69 yaşında saat 9:00 radələrində ürək çatışmazlığından vəfat edib. Bir neçə il bundan əvvəl ürəyindən cərrahiyyə əməliyyatı keçirən mərhum, uzun illər ürək ağrılarından əziyyət çəkib. Mərhumla vida mərasimi onun Mərdəkandakı bağ evində keçiriləcək.

Qeyd edək ki, mərhum Yusif Muxtarov 1941-ci il aprelin 23-də anadan olub. Azərbaycan Dövlət Mədəniyyət və İncəsənət Universitetini və Plexanov adına Moskva Dövlət Xalq Təsərrüfatı Akademiyasını bitirib. Əmək fəaliyyətinə 1964-cü ildən Azərbaycan Dövlət Radio və Televiziya şirkətində diktor kimi başlayıb. 1994-cü ilə kimi orada diktor, ictimat- siyasi verilişlər redaksiyasının baş redaktoru, diktor şöbəsinin bədii rəhbəri vəzifələrində çalışıb. 1991-ci ildə əməkdar artist fəxri adı alan Yusif Muxtarov 1992-ci ildən bu günə kimi Bakı Bələdiyyə Teatrının sərəncamçı direktorudur. Muxtarov Yusif Mehdi oğlu bu illər ərzində bir çox filmlərdə, televiziya tamaşalarında yaddaqalan rollar yaradıb. Onlardan N. Hikmətin “Qəribə adam”, M. Y. Lermontovun “İki qardaş”, S. Vurğunun “Vaqif”, S. Rəhmanın “Xoşbəxtlər”, N. Hikmətin “Bayramın ilk günü”, Baycıyevin “Duel”, Ç. Aytmatovun “Qırmızı yaylıqlı qovağım mənim”, İ. Əfəndiyevin “On iki manatlıq lüstr”, “Söyüdlü arx” kimi televiziya tamaşalarında və Azərbaycan kinostudiyasında çəkilən “Baladadaşın məhəbbəti”, “Qatarda qətl” filmlərində yaddaqalan obrazları qeyd etmək olar. Azərbaycan radiosunun qızıl fondunda Y. Muxtarovun səsi olan 350-dən artıq bədii verilişlər saxlanmaqdadır. Azərbaycan dilində onun səsi ilə mindən artıq film səsləndirilib. YUNESKO-nun iki qızıl diskində onun səsi yazılaraq qorunur. Yusif Muxtarovun Bakı Bələdiyyə Teatrının yaranmasında, inkişafında və teatrın xarici ölkələrdə layiqincə təmsil olunmasında əvəzsiz xidmətləri var.
Yusif Muxtarov teatrın Azərbaycan ordusu qarşısında müntəzəm və davamlı çıxışlarının təşkili üçün 2005-ci ildə Teatr Xadimləri İttifaqının təsis etdiyi “Qızıl Dərviş” mükafatına layiq görülüb. 1999-cu ildə Türkiyənin İstanbul hərbi hava akademiyasının qızıl medalı, 2003-cü ildə isə Tehranda keçirilən Beynəlxalq Teatr festivalının qızıl medalı ilə təltif edilib. 2002-ci ilin noyabrın 7-də Bakı Bələdiyyə Teatrının 10 illiyi ilə əlaqədar Prezident Heydər Əliyevin fərmanı ilə Yusif Muxtarova xalq artisti fəxri adı verilib.