İncəsənət

İncəsənət

Azərbaycanın xalq artisti, tanınmış rəqqasə Əminə Dilbazi ilə vida mərasimi keçirilib - FOTOSESSİYA

Azərbaycanın xalq artisti, tanınmış rəqqasə Əminə Dilbazi ilə vida mərasimi keçirilib - <font color=red>FOTOSESSİYA</font>

01 may 2010 12:10 (UTC +04:00)

APA-nın məlumatına görə, vida mərasimində mədəniyyət və turizm naziri Əbülfəz Qarayev, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, rəqqasənin sənət yoldaşları və pərəstişkarları iştirak ediblər. Azərbaycan xalq artisti Böyükağa Məmmədov bildirib ki, Əminə Dilbazi ilə 1946-cı ildən bir yerdə işləyib: “Biz onunla 30 il bir yerdə işləmişik. Dünyanın 60-dan artıq ölkəsində olmuşuq. Bir yerdə “Naz eləmə”ni oynamışıq. Çox yaxşı, səmimi, gülərüz qadın idi. Yaxşı yoldaşlığı var idi. O bizə həm bacılıq, həm müəllimlik edirdi”.

Azərbaycanın xalq artisti Təranə Muradova isə deyib ki, Ə. Dilbazi milli rəqs məktəbi yaradıb: “Biz hamımız onun davamçılarıyıq. Əminə xanımla birlikdə İncəsənət Gimnaziyasında işləyirdim. Milli rəqslərimizi sevən, bütün dünyada təmsil edən və bizə yol göstərən Əminə xanım qəlbimizdə əbədi yaşayacaq. Bu, bizim üçün böyük itkidir”.

Ə. Dilbazi ilə 40 il çiyin-çiyinə işlədiyini deyən xalq artisti Roza Cəlilova isə bildirib ki, o, öz xalqının, sənətinin fədaisi idi: “Bizə böyük kədər üz verib. İnanmıram ki, bu gün sıralarımızda yoxdur. Amma o xoşbəxtdir ki, xalqın qəlbində yaşayacaq. İkinci Əminə Dilbazi bir də dünyaya gəlməyəcək”.

Ə. Dilbazi II Fəxri Xiyabanda dəfn olunacaq.

Qeyd edək ki, Əminə Paşa qızı Dilbazi 26 dekabr 1919-cu ildə Qazaxda anadan olub. 1935-ci ildə ilk dəfə səhnəyə çıxan xanım Üzeyir Hacıbəyovun bəstələdiyi “Kolxoz çölləri” mahnısını oynayıb. Azərbaycan Dövlət Filarmoniyası Mahnı və Dövlət Rəqs ansamblının solisti (1936-1939), sonralar isə rəqs qrupunun rəhbəri olub. 1959-cu ildə Azərbaycan Tibb İnstitutunun yaratdığı “Çinar” tələbə rəqs kollektivinə rəhbərlik edib. 1967-ci ildə “Sevinc” qızlar ansamblını yaradıb. 1949-cu ildən Xoreoqrafiya Məktəbində pedaqoji fəaliyyət göstərib. 1957-ci ildə Moskvada tələbə və gənclərin 6-cı ümumdünya festivalında qızıl medala layiq görülüb. Əminə Dilbazi bir çox filmlərdə rəqslərə quruluş verib. Onun oynadığı “İnnabı”, “Tərəkəmə”, “Vağzalı-Mirzeyi”, “Turacı”, “Naz eləmə” rəqsləri xüsusilə məşhurdur. Repertuarına rus rəqsləri, ukrayna rəqsləri, özbək rəqsləri, ərəb rəqsləri də daxil olan Əminə Dilbazi “Leyli və Məcnun” operasında, “Arşın Mal Alan” və “O olmasın bu olsun” komediyaları və sair əsərlərdə də rəqslərə quruluş verib.