İncəsənət

Ana səhifə

İncəsənət

Sabah Firəngiz Əlizadənin «İntizar» operasının yeni quruluşda premyerası olacaq

10 may 2010 08:10 (UTC +04:00)

Bakı. Laçın Sultanova - APA. Mayın 11-də Heydər Əliyev Fondu beynəlxalq musiqi layihəsi çərçivəsində Heydər Əliyev Sarayında Firəngiz Əlizadənin “İntizar” operasının yeni quruluşda premyerasını təqdim edəcək.

Fonddan APA-ya bildiriblər ki, beynəlxalq bədii heyət tərəfindən hazırlanmış yeni quruluş müasir Avropa musiqili teatr rejissurası prinsiplərinə əsaslanır.

Tamaşanın bədii tərtibatında ən müasir bədii-texnoloji vasitələr (hərəkətli səhnə, video-instalyasiya, mürəkkəb işıq partiturası) geniş tətbiq edilib. Libretto müəllifi “Üns” yaradıcılıq səhnəsinin yaradıcısı və bədii rəhbəri, professor Nərgiz Paşayevadır. O, Azərbaycan ədəbiyyatına dair monoqrafiyaların, dərsliklərin, elmi məqalələrin, “Üns” teatrında hazırlanmış çoxsaylı musiqi və teatr layihələrinin müəllifi və rəhbəridir.

Əsərdə Azərbaycan tarixinin yaxın keçmişində baş vermiş faciəli hadisələr xeyirlə şərin əbədi mübarizəsi kimi ümumbəşəri mövzu kontekstində açılır. Xəyanət və hiylə ilə qonaqpərvər diyara gələn şər qüvvələr xoş niyyətli sakinlərin sakit və dinc həyatını, arzularını məhv edir, zorakılıq və qəsbkarlıqla səfalı bir diyarı viran qoyur, insanları amansızcasına qətlə yetirir, var-yoxunu talayır, doğma yurd-yuvalarından didərgin salır. Bu dəhşətli hadisələrin əks-sədası bir ailənin faciəli taleyində izlənilir. Amma şər qüvvələrin basqısı nə qədər dəhşətli və ağrılı, güclü olsa belə, onlar Vətən sevgisi, ailə məhəbbəti ilə saf və imanlı həyat yaşayan insanların nə müqavimətini qırmaq, nə də onların qəlbindəki mübarizə əzmini məhv etmək iqtidarında deyil. Hadisələrin faciəvi axarına baxmayaraq, əsər əmin-amanlıq və xoşbəxtliyin, ədalətin intizarında olan insanların gələcəyə inam və ümidlərini, mübarizə əhval-ruhiyyəsini əks etdirən təsirli finalla bitir.

Tamaşanın quruluşçu rejissoru Moskva “Helikon-opera” teatrının bədii rəhbəri, “Qızıl maska” teatr mükafatı laureatı, Rusiyanın xalq artisti, professor Dmitri Bertmandır. Quruluşçu rəssam Hartmut Şorqhofer, dirijor Vladimir Ponkin, xoreoqraf Edvald Smirnov, xormeyster Gülbacı İmanova, geyim üzrə rəssam Korina Xrome, işıq üzrə rəssam Aleksandr Naumov, qrim üzrə rəssam Aliya Nurakişeva, video üzrə fettfilm Momme Hinriks, Torqe Mülle, səs rejissorları Stanislav Şevtsov, İqor Yurçenko, konsertmeysterlər Məlahət İsmayılova, Nərminə Əfəndiyevadır. Operada partiyaları gənc ifaçılar Ramil Qasımov, İnara Babayeva, Əvəz Abdullayev, Səbinə Vahabzadə, İlham Nəzərov, Azər Rzayev, Nəzrin Zərbəliyeva, Məhsəti Cabbarova, Anton Fernştadt, Tələt Hüseynov, Tural Ağasıyev, Mirpaşa Şükürov ifa edirlər.