İncəsənət

İncəsənət

Sərxan Sərxan uzun fasilədən sonra Bakıda konsert proqramı ilə çıxış edib – FOTOSESSİYA

Sərxan Sərxan uzun fasilədən sonra Bakıda konsert proqramı ilə çıxış edib – <font color=red>FOTOSESSİYA </font>

19 iyun 2010 08:11 (UTC +04:00)

Bakı. Ülkər Qasımova - APA. Uzun illərdir, Moskvada yaşayan azərbaycanlı müğənni Sərxan Sərxan ötən gün Bakı səhnəsində solo-konsert verib. APA-nın məlumatına görə, iyunun 18-də doğum günü olan sənətçi elə ad gününü də Azərbaycanda, uzun müddətdir arzuladığı yerli səhnədə qeyd edib. Konsert Sərxan Sərxanın öz istəyi ilə baş tutub. Belə ki, bu konsertdə bilet satışı olmayıb və konsertini azsaylı tamaşaçılar dəvətnamə ilə izləmək imkanı qazanıb. Müğənni konsert vermək üçün qonorar tələb etməyib. “Nostalji” adı altında keçirilən konsertdə Sərxan Sərxan repertuarındakı köhnə və müəllif mahnılarını, eləcə də Azərbaycanın korifey sənətkarlarının musiqilərini ifa edib. S. Sərxan səhnədə Azərbaycan tamaşaçısı üçün və bu səhnə üçün çox darıxdığını bəyan edib: “Mənim üçün ən sevimli səhnə və tamaşaçı sizlərsiniz. Çox sevinirəm ki, bu həsrətimizə bu gün son qoyuldu. Ad günümü sizlərlə birgə qeyd etmək də mənim üçün gözəl hissdir. Nə yaxşı mən sizləri, sizlərsə məni sevirsiniz”.
Sərxan Sərxan iki saatdan artıq davam edən konsertdə öz bəstəsi olan “Ay gecikən məhəbbətim”, Azərbaycanın korifey bəstəkarlarının “Yalqızam, yalqız”, “Sevgilim”, “Na şocke rodinka”, “Pozvoni skorey” və digər musiqiləri oxuyub. Həm Azərbaycan, həm də rus dillərində mahnılar təqdim edən Sərxan Sərxan səhnədə çoxsaylı hədiyyələr alıb. Ancaq Sərxan Sərxan onun üçün ən böyük hədiyyənin sevənləri qarşısında çıxış etməsi və Moskvada yaşayan qızı Kamilanın onun konsertində iştirak etməsi olduğunu vurğulayıb. Qızını səhnəyə dəvət edən müğənni ona hədiyyə edilən içində öz şəkli olan çərçivəni qızına bağışlayıb və ona “bunu sənə verirəm ki, məni heç zaman unutmayasan” deyib. Qızı isə atasına onunla fəxr etdiyini və onu heç zaman unutmadığını deyib. Sərxan Sərxan səhnədə öz yaşını açıqlamayıb və “məni necə görürsünüzsə elə o yaşdayam” deyib. Hər bir mahnının tempinə uyğun rəqs edən müğənni, səhnədə tvist də oynayıb.
Konsertdə müğənninin sənət dostlarının iştirak etməməsi də nəzərdən qaçmayıb. Sərxan Sərxan isə heç bir sənət yoldaşına dəvətnamə göndərmədiyini açıqlayıb. Ancaq konsertdə Moskvadan məhz müğənnini təbrik etmək üçün Azərbaycana gələn dostları da olub.