İncəsənət

İncəsənət

Şəkidə “İpək Yolu” I Beynəlxalq Musiqi Festivalının təntənəli açılış mərasimi keçirilib – FOTOSESSİYA

Şəkidə “İpək Yolu” I Beynəlxalq Musiqi Festivalının təntənəli açılış mərasimi keçirilib – <font color=red>FOTOSESSİYA</font>

28 iyun 2010 06:59 (UTC +04:00)

APA-nın Şəkiyə ezam olunmuş əməkdaşının məlumatına görə, festivalın açılış mərasimində çıxış edən Azərbaycan Bəstəkarlar İttifaqının sədri, xalq artisti, professor Firəngiz Əlizadə festivalın ənənəvi olaraq keçiriləcəyini vurğulayıb, festivalın işinə uğurlar arzulayıb: “Şəki özündə tarix yaşadan bir şəhərdir. İpək yolu Şəkidən keçdiyi üçün biz bu festivalın adını da məhz bu cür qoyduq. Əminik ki, Şəki əhalisi bu festivaldan doyunca zövq alacaq”.

F. Əlizadə deyib ki, iyulun 2-dək davam edəcək festivalın proqramına xüsusi diqqət yetirilib: “Biz istəyirik ki, gözəl musiqilər Azərbaycanın ən gözəl guşələrində səslənsin. Bu festivalın proqramı doğrudan da çox maraqlıdır. Bizi çox gözəl konsertlər gözləyir. Ən gözəl operalarımız “Leyli və Məcnun” və “Şah İsmayıl” açıq hava altında nümayiş olunacaq. Burada yeni “Oazis” simli kvartetin təqdimatı olacaq. Koreyadan qeyri-adi folklor ansamblı milli kostyumlarda çıxış edəcək. Norveçdən gələn “Sarı gəlin” ansamblı da maraqlı proqram hazırlayıb”.

Açılış mərasimində Şəki şəhər İcra Hakimiyyəti başçısının müavini Zərinə Cavadova Şəkinin 2010-cu ildə Sənətkarlıq Paytaxtı elan olunduğunu diqqətə çatdırıb, ilboyu bu cür yüksək səviyyəli tədbirlərin həyata keçiriləcəyini vurğulayıb.

Daha sonra mərasimdə xalq artisti Teymur Göyçayevin rəhbərliyi altında Qara Qarayev adına Azərbaycan Dövlət Kamera Orkestri xüsusi proqramla çıxış edib. Proqramda Azərbaycan bəstəkarlarından Üzeyir Hacıbəyli, Qara Qarayev, Tofiq Quliyev, Aqşin Əlizadə, Süleyman Ələsgərov, dünya bəstəkarlarından Pyotr Çaykovski, Volfqanq Amadey Motsart, Alexander Anderson və digərlərin əsərləri səslənib. Orkestrin çıxışı yerli sakinlər, eləcə də xarici qonaqlar tərəfindən alqışlarla qarşılanıb.

Açılış mərasiminin sonunda Şəki şəhər İcra Hakimiyyəti başçısının birinci müavini Həsən Həsənov Teymur Göyçayevə fəxri fərman təqdim edib.

İpək_Yolu