İncəsənət

İncəsənət

“Leyli və Məcnun” və “Şah İsmayıl” operaları Şəkidə ilk dəfə olaraq açıq səma altında göstərilib - FOTOSESSİYA

“Leyli və Məcnun” və “Şah İsmayıl” operaları Şəkidə ilk dəfə olaraq açıq səma altında göstərilib - <font color=red>FOTOSESSİYA</font>

01 iyul 2010 01:57 (UTC +04:00)

Şəki. Ülkər Qasımova - APA. İyunun 30-da Şəkidə keçirilən “İpək Yolu” I Beynəlxalq Musiqi Festivalı çərçivəsində Azərbaycan Bəstəkarlar İttifaqı nümayəndə heyətinin Şəki ziyalıları ilə görüşü və konfransı baş tutub. APA-nın Şəkiyə ezam olunmuş əməkdaşının məlumatına görə, görüş şəhərin Musiqi Kollecində keçirilib. Görüş zamanı müxtəlif mövzularda fikir mübadiləsi aparılıb.

Daha sonra festival Azərbaycan Dövlət Akademik Opera və Balet Teatrının Üzeyir Hacıbəylinin “Leyli və Məcnun”, Müslüm Maqomayevin “Şah İsmayıl” operalarının konsert variantlarının nümayişi ilə davam etdirilib. “Yuxarı Karvansaray”da baş tutan nümayiş ilk dəfə olaraq açıq səma altında təşkil olunub. “Leyli və Məcnun” operasında əsas rollarda İlkin Əhmədov, Vüsalə Mirzəyevə, “Şah İsmayıl” operasında isə xalq artisti Şahlar Quliyev, əməkdar artist Təyyar Bayramov, İlahə Əfəndiyeva, Arzu Əliyeva çıxış ediblər. Hər iki tamaşanın quruluşçu rejissoru əməkdar artist incəsənət xadimi Hafiz Quliyev, dirijoru və xormeysteri Sevil Hacıyevadır. Hər biri 55 dəqiqə davam edən bu tamaşaların başqa regionlarda da nümayişinin təşkili nəzərdə tutulur. Hər iki opera nümayişi çoxsaylı yerli və əcnəbi tamaşaçıların iştirakı ilə uğurla baş tutub.

Nümayişdən sonra tədbirdə iştirak edən Şəki şəhərinin icra başçısı Murad Cabbarlı operalarının quruluşçu rejissoru Hafiz Quliyevə və eləcə də əsas rolların ifaçılarına Şəki şəhərinin fəxri fərmanını təltif edib və aktyorlara uğurlu tamaşaya görə təşəkkürünü bildirib.

Qeyd edək ki. Azərbaycan Bəstəkarlar İttifaqının və Şəki şəhər İcra Hakimiyyətinin təşkilatçılığı. Mədəniyyət və Turizm Nazirliyinin dəstəyi ilə keçirilən “İpək Yolu” I Beynəlxalq Musiqi Festivalı iyulun 2-də öz işini başa vuracaq.