İncəsənət

Ana səhifə

İncəsənət

Azərbaycan filmlərinin yerli kinoteatrlarda seanslara salınmamasının səbəbi nədir? - SORĞU

Azərbaycan filmlərinin yerli kinoteatrlarda seanslara salınmamasının səbəbi nədir? - <font color=red>SORĞU</font>

08 sentyabr 2011 11:50 (UTC +04:00)

Bakı. Ülkər Qasımova-APA. Bu gün Azərbaycanda kino sənayesinin mövcud vəziyyəti müvafiq sahənin mütəxəssislərini narahat edir. Kinomuzda bir çox çatışmazlıqların olması ilə bağlı yetəri qədər söhbət açılıb. Hazırda kino sənətinin inkişafı üçün müəyyən addımlar atılsa da, bu addımlar nə kino istehsalında hiss olunur, nə də tamaşaçıda Azərbaycan kinosuna marağı artırır. Bununla yanaşı, paytaxt kinoteatrlarında milli filmlərimizin nümayişinin təşkil olunmaması faktı da var. APA mövcud özəl kinoteatrlarda Amerika filmləri ilə bərabər Azərbaycan filmlərinin də seanslara salınmamasının səbəblərini araşdırıb.

“Azərbaycan” kinoteatrı: “Əgər film işləmirsə, artıq onun göstərilməsi də çətinləşir”

Mövzu ilə bağlı əlaqə saxladığımız “Azərbaycan” Beynəlxalq Kino Şirkətinin yayım üzrə koordinatoru Faiq Kazımov sözügedən məsələnin səbəblərindən danışıb. F. Kazımov deyib ki, ölkədə ilk dəfə olaraq Azərbaycan filmlərinin nümayişi ilə məhz “Azərbaycan” kinoteatrı məşğul olub: “Bu gün bütün dünyada kino sənayesi bu cür qurulub ki, nümayişdən qazanc əldə edilməlidir. Ən əsası odur ki, film işləsin və biz qazanc əldə edək. Eynilə də bu prodüser mərkəzinə, filmin yaradıcı heyətinə də lazımdır. Məhz qeyd etdiyim şərtlərlə filmi nümayişə qoyuruq. Əgər film işləmirsə, artıq onun göstərilməsi də çətinləşir. Axı bunun elektrik enerjisi var, işçilərə nəzərdə tutulan əmək haqları var. Axı mümkün deyil ki, biz filmi nümayişə çıxaraq, amma baxan olmasın. Bu düzgün iş deyil”. F. Kazımov onu da bildirib ki, “Azərbaycan” kinoteatrı özəl qurum kimi fəaliyyət göstərir və dövlət kinoteatrı deyil: “Əgər dövlət statusunda olsaydı o zaman çox rahat şəkildə Azərbaycan filmlərinin nümayişi mümkün olardı. Çünki bu cür olduğu halda heç bir problem olmazdı. Amma hazırkı məqam da biz işləməsək o zaman bağlamalıyıq”.

Oqtay Mirqasımov “Ovsunçu” filminə tamaşaçı marağının olmamasını görüb üç gündən sonra nümayişini dayandırıb...

Kino şirkətin rəsmisi yerli filmlərə auditoriyanın maraq göstərmədiyini də açıqlayıb: “Bu gün tamaşaçı Azərbaycan filmlərinə maraq göstərmir. Bəzən hətta olub ki, biz filmi nümayişə çıxarmışıq, filmin rejissoru gəlib deyib ki, “lazım deyil, çıxarın”. Görüblər ki, filmə maraq yoxdur, özləri çıxarıblar. Oqtay Mirqasımovun “Ovsunçu” filmi kinoteatrda üç gün getdi və sonra özü gəlib bu filmin nümayişini dayandırdı. Çünki gördü ki, izləyici gəlmir. Bizim camaatımız Azərbaycan filmlərindənsə xarici filmlərə baxmağı üstün tuturlar”. Onu da öyrəndik ki, Azərbaycan filmlərinin bilet satış qiyməti də Amerika filmləri ilə eyni olur.

“ParkCinema”nın cavabı olmadı

Ölkədə fəaliyyət göstərən və yetəri qədər tamaşaçı auditoriyası olan digər özəl kinoteatr “ParkCinema”dan mövzu ilə əlaqədar suallarımızı cavabsız qoydular. Bu kinoteatrda gündəlik olaraq 5 seans Amerika filmləri göstərilir. Amma çoxsaylı xarici filmlər arasında bir dəfə də olsun seanslarda yerli kinomuzun adına rast gəlinməyib. Görünür, “ParkCinema” da “Azərbaycan” kinoteatrında hökm sürən problemlə üzləşir.

Yusif Şeyxov: “Hazırda bütün dünyanı Amerika kinosu ələ alıb”

Azərbaycan filmlərinə tamaşaçı marağının olmaması, bu filmlərin kinoteatrlarda göstərilməsinin səbəblərinə Mədəniyyət və Turizm Nazirliyinin Filmlərin təbliği və qeydə alınması sektorunun müdiri, əməkdar mədəniyyət işçisi Yusif Şeyxovun yanaşması da maraqlıdır. Nazirlik rəsmisi bu halın Azərbaycan kinolarına tamaşaçı marağının olmaması ilə əlaqələndirməyib, hazırda bütün dünyada kino sənayesində mövcud durumun yaşandığını bildirib: “Azərbaycandakı kinoteatrların dünya kinoteatrları ilə müqayisədə orijinallığı ilə seçilməsini demək düzgün olmaz. Hazırda bütün dünyanı Amerika kinosu alıb. Yerli film istehlakçılara köməklik göstərmək üçün müxtəlif yollar axtarılır, güzəştlər olunur. Amma bu kinoların repertuarına təsir eləmir və Amerika filmləri yenə də birinci yerdədir. Bu hal Avropa ölkələrinin imkanlarından da kənardır. Təəssüf ki, bu hal bizə də aiddir”.

“Nizami” kinoteatrında əsas vəzifə yerli filmlərin nümayişidir

“Nizami” kinoteatrının yaxın zamanlarda artıq işə başlayacağını deyən Y. Şeyxov, bu məkanda əsas vəzifələrindən birinin məhz Azərbaycan filmlərini göstərmək olduğunu vurğulayıb: “Bu kinoteatrda tamaşaçılara yerli filmlərə baxmağa sözün tam mənasında imkan yaradılacaq. Bütün dünyada kinoteatr kommersiya məqsədi daşıyır və heç kəs sahibkara hansı filmi göstərməsi ilə bağlı əmr verə bilməz. Bu sahibkar üçün arqument deyil. Sahibkarın işi pul qoyub pul götürməkdir”.

Azərbaycanda istehsal olunan yeni filmlərinin keyfiyyətinə gəldikdə isə nazirlik rəsmisi, bu sahənin inkişafı üçün lazımi tədbirlərin görüldüyünü qeyd edib: “Bizim filmləri çəkən rejissorların, filmlərin ssenarilərini yazanların hər biri göz qabağındadır. Ən yaxşıları film çəkir, ən yaxşı ssenarilər ekranlaşdırılır. Lisenziyaları artırırıq, stimullaşdırma imkanlarından geniş istifadə olunur, əmək haqları, qonorarlar artırılır. Amma bu gün demək ki, Azərbaycan filmlərinə tamaşaçı baxmır, bu, düzgün fikir deyil. Filmlərin yayılmasının bir neçə üsulu var və bunlardan biri son ərəfədə yaranmış DVD disklərdə, televiziya kanallarında nümayişidir. Azərbaycan filmlərinin bu üsullarla yaymaq mümkündür və bu iş aparılır. Kanallarda da istər köhnə, istər yeni filmlərimiz göstərilir”.