İncəsənət

Ana səhifə

İncəsənət

Bakıda “Muşketyorlar 3D” filminin press-premyerası keçirilib – FOTO

Bakıda “Muşketyorlar 3D” filminin press-premyerası keçirilib – <font color=red>FOTO </font>

05 oktyabr 2011 08:24 (UTC +04:00)

Bakı. Ülkər Qasımova-APA. “Park Cinema” kinoteatrında Azərbaycan media mənsubları üçün yeni çəkilən və oktyabrın 1-də dünya kinoteatrlarında nümayişinə start verilən “Muşketyorlar 3D” filminin press-premyerası keçirilib. APA-nın məlumatına görə, nümayişdən əvvəl çıxış edən “Park Cinema”nın baş direktoru Namiq Quliyev filmin ilk olaraq media nümayəndələrinə nümayiş etdirməkdən zövq aldıqlarını qeyd edib.

Onun sözlərinə görə, jurnalistlər üçün təşkil olunan premyeranın məqsədi Azərbaycanda film mədəniyyətini inkişaf etdirməkdir. Film oktyabrın 13-dən “Park Cinema” kinoteatrında nümayiş olunmağa başlayacaq. Macəra-ekşn janrındakı bu film Aleksandr Dümanın klassik romanının motivləri əsasında “Şər iqamətgahı 3D” filminin rejissoru tərəfindən çəkilib. Filmin rollarında Loqan Lerman, Mila Yovoviç, Metyu Makfeyden, Rey Stivenson, Lyuk Evans, Meds Mikkelsen, Qabriela Uald, Ceyms Korden, Juno Templ, Freddi Foks, Orlando Blum, Kristof Valts çəkiliblər.

Filmin prodüseri Ceremi Bolt “Üç muşketyor 3D” filmi haqqında fikirlərini də bölüşüb: “Əminliklə deyə bilərəm ki, bu film qeyri-adidir. Qılınclar, indiyədək qılınc oynatma haqqında olan filmlərdə olduğundan daha tez hərəkət edəcəklər, kostyumlar daha rəngarəng olacaqlar. Hadisələr, elmi-fantastik filmində olduğu kimi baş verəcək, onların cərəyan etdiyi yer heyranlıq doğurur, tarix isə unudulmur”.

Filmin rejissoru Pol Anderson isə əlavə edib ki, filmdə bir çox amillər Dümanın əsərini daha cəlbedici edir: “Amma ən başlıcası odur ki, dostluq, qəhrəmanlıq haqqında oxuduğum ən yaxşı və ən klassik əsərdir. “Bir nəfər hamımız üçün, hamımız bir nəfər üçün” çağırışını xatırlamaq kifayətdir! Bu çox güclü əsərdir. Qəhrəmanlıq, dostluq, romantika heç vaxt dəbdən düşməyəcək. Və fərqi yoxdur ki, sizin on yaşınız var, yoxsa yüz, bu şeylər 2011-ci ildə, elə 1911-ci ildə olduğu kimi tamaşaçıya yaxındır. Bundan sonra yüz il də keçsə, bu əsas anlayışlar hələ də insanlar üçün cəlbedici olacaq. “Üç muşketyor”un əsasını bu təşkil edir”.