İncəsənət

Ana səhifə

İncəsənət

Səfurə İbrahimova uzun fasilədən sonra yenidən Akademik Milli Dram Teatrına gəlib

21 oktyabr 2011 15:20 (UTC +04:00)

Bakı. Ülkər Qasımova-APA. Azərbaycanın xalq artisti, Səfurə İbrahimova uzun fasilədən sonra Akademik Milli Dram Teatrına gəlib. APA-nın məlumatına görə, aktrisa ötən həftəsonu teatrda keçirilən həmkarı Yaşar Nurinin 60 illik yubileyində iştirak edib. Aktrisa səhnəyə çıxaraq yubilyarı gül dəstəsi ilə təbrik edib. Bu sevimli aktrisanın uzun illərdən bəri teatr səhnəsinə ilk çıxışı olub.

Teatrın direktoru İsrafil İsrafilovdan öyrəndik ki, Səfurə İbrahimovanın yenidən teatrda işləməsi hələlik nəzərdə tutulmur: “Doğrudur, Safurə xanım yubiley mərasimində qonaq qismində iştirak etdi. Amma onun yenidən teatra dəvət etməmişəm. Belə bir məsələ gündəlikdə yoxdur. Heç o özü də bunun üçün müraciət etməyib”.

Qeyd edək ki, Səfurə İbrahimova 1961-ci ildən Akademik Teatrın truppasına daxil olub. Həmin vaxtdan son illərə kimi bu kollektivdə çalışıb. Səfurə İbrahimova səhnədə Kamalə, İnci ("Toy" və "Xoşbəxtlər", Sabit Rəhman), Əsmər ("Alov", Mehdi Hüseyn), Fernando ("Dəlilər", Lope de Veqa), Gülnar və Tamara ("Vaqif", Səməd Vurğun), Nazlı ("Ölülər", Cəlil Məmmədquluzadə), Ofeliya ("Hamlet", Vilyam Şekspir), Hafizə ("Pəri cadu", Əbdürrəhim bəy Haqverdiyev), Karola ("Füsunkar qız", Mlkolaş Dyarfaş), Jasmen, Vəfa ("Knyaz" və "Xəyyam", Hüseyn Cavid), Daduno ("Darıxma, ana", Nodar Dumbadze), Sona ("Xanuma", Avksenti Saqareli), Cen ("Mariya Tüdor", Viktor Hüqo), Maral ("Sənsiz", Şıxəli Qurbanov), Saşa ("Canlı meyit", Lev Tolstoy), Sevil ("Sevil", Cəfər Cabbarlı), Balaxanım ("Adamın adamı", Anar), Mədinə, Tubu xanım ("Sevgililərin cəhənnəmdə vüsalı" və "Hökmdar və qızı", İlyas Əfəndiyev), Durdensiya ("Dişi canavar", Federiko Qarsia Lorka), Zəhra bəyim ("Anamın kitabı", Cəlil Məmmədquluzadə), Mələk ("Köhnə ev", Əli Əmirli) rollarında daha çox sənət uğurları qazanıb.

Aktrisanın kino rolları arasında Telli ("Arşın mal alan"), Həbibə ("Qatır Məmməd"), Dilbər ("Sevil"), Gülpəri ("Dərviş Parisi dağıdır"), Mədinə ("Alma almaya bənzər") obrazları daha məşhurdur. Xalq artisti Mehdi Məmmədovun quruluşunda Hüseyn Cavidin "İblis" faciəsində Rəna roluna görə dövlət mükafatı olub.