İncəsənət

Ana səhifə

İncəsənət

Azərbaycanın xalq rəssamı Kamil Əliyevə həsr olunan kitab-albomun təqdimat mərasimi keçirilib

22 oktyabr 2011 10:57 (UTC +04:00)

Bakı. Ülkər Qasımova – APA. Bu gün Azərbaycanın xalq rəssamı Kamil Əliyevin 90 illik yubileyi ilə əlaqədar Fəxri Xiyabanda məzarı ziyarət olunub. APA-nın məlumatına görə, ziyarətdə Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə, Milli Məclisin deputatı Fəttah Heydərov, incəsənət xadimləri və digər şəxslər iştirak ediblər.
Daha sonra İçərişəhərdə, Kamil Əliyevin Xalça Muzeyində “Kamil Əliyevin xalça dünyası” kitab-albomunun təqdimat mərasimi keçirilib. Layihənin müəllifi, tərtibçi-redaktoru, əməkdar incəsənət xadimi Abdulla Qurbani Kamil Əliyevlə bağlı xatirələrini danışıb. Müəllif deyib ki, nəşr üç dildə hazırlanıb. Nəşrin ilk səhifələrində xalq rəssamının həyat və keçdiyi yaradıcılıq yolu barədə məlumatlar verilib. Kataloqda Kamil Əliyevin portret-xalçaları, ornamental xalçaları, eskiz və kompozisiyaları toplanıb.
Tədbirdə çıxış edən QMİ sədri, Şeyxülislam Allahşükür Paşazadə Kamil Əliyevi Azərbaycan xalça sənətinin qorunmasında və inkişafında mühüm xidmətlər göstərmiş sənət fədailərindən biri adlandırıb: “Tarixə iz salmış Kamil Əliyev çox şaxəli və orijinal üslubu ilə milli mədəniyyətimizə töhfələrini verib. Onun əsərləri Azərbaycan xalçaçılıq sənətində, rəssamlıq məktəbində daim yaşayacaq və çox görkəmli əsərlər kimi Azərbaycan mədəniyyəti xəzinəsində öz yerlərini tutacaq”.
Millət vəkili Fəttah Heydərov çıxışında Kamil Əliyevi Azərbaycan incəsənətini yüksəkliklərə qaldıran, onu öz əsərləri ilə daha da zənginləşdirən görkəmli şəxslərdən biri kimi dəyərləndirib: “Biz Azərbaycanın böyük şəxsiyyətlərindən birinin ocağına yığışmışıq. Kamil Əliyev yaradılışdan seçilmiş bir insan olub. Seçildiyini də həyat boyu sübuta yetirilib. Rəssamın əsərləri Paris, London, Tokio, Dehli, Ankara, İstanbul, Tehran, Moskva, Kiyev və başqa şəhərlərin nüfuzlu muzey və qalereyalarında nümayiş etdirilir və bütün dünyada tamaşaçıların rəğbətini qazanıb. Kamil Əliyevin portret-xalçalarının ikinci silsiləsi müxtəlif ölkələrin tanınmış siyasət və dövlət xadimlərinə həsr olunub. Kamil Əliyev Heydər Əliyevin Azərbaycanın Ali Baş Komandanı kimi general libasında portret xalçasını da yaradıb”.

Qeyd edək ki, Kamil Əliyevin 90 illik yubiley tədbirləri Azərbaycan prezidenti İlham Əliyevin sərəncamı əsasında keçirilir. Yubiley tədbirləri oktyabrın 25-də də davam etdiriləcək. Eyni zamanda, dekabr ayına kimi xalq rəssamı Kamil Əliyevin 90 illik yubiley mərasimlərinin Naxçıvan, Gəncə, Quba, Xaçmaz və İsmayıllı rayonlarında da keçirilməsi planlaşdırılır.

Kamil Əliyev _ 90