İncəsənət

Ana səhifə

İncəsənət

“Qaya” instrumental vokal ansamblının yaradıcısı Teymur Mirzəyev: “Məşq etməyə yerimiz belə yox idi..” - FOTO

“Qaya” instrumental vokal ansamblının yaradıcısı Teymur Mirzəyev: “Məşq etməyə yerimiz belə yox idi..” - <font color=red>FOTO</font>

17 noyabr 2011 10:53 (UTC +04:00)

Bakı. Ülkər Qasımova-APA. Sabah Mədəniyyət və Turizm Nazirliyinin təşkilatçılığı ilə Heydər Əliyev Sarayında əfsanəvi “Qaya” kvartetinin yaranmasının 50 illik yubileyi münasibətilə tədbir keçiriləcək. APA-nın məlumatına görə, yubiley tədbiri ilə əlaqədar olaraq bu gün mətbuat konfransı təşkil olunub. Tədbirdə “Qaya” ansamblının yaradıcısı və bədii rəhbəri Teymur Mirzəyev, ilk solistlərindən biri Rauf Babayev və yubiley tədbirinin rejissoru Cavid İmamverdiyev iştirak ediblər.

50 yaşını qeyd edən “Qaya”nın yarandığı günləri xatırlayan Teymur Mirzəyev, Rauf Babayevlə birgə 1953-cü ildən Asəf Zeynallı adına musiqi texnikumunda, sonra konservatoriyada təhsil aldıqları günlərdən danışıb: “Həmin vaxtlarda çoxsəsli oxumağa vurulmuşduq. Məşq etməyə yerimiz olmadığından harada gəldi, gecə-gündüz məşq edirdik. Əlimizdə kamerton bulvarın skamyasında, xəlvətcə filarmoniyada, konservatoriyanın otaqlarında məşqlər edirdik. 1961-ci ildə isə Arif Hacıyev, Teymur Mirzəyev, Lev Yelisavetski və Rauf Babayevdən ibarət olan qrupla professional səhnəyə çıxmağa başladıq. Ona görə də məhz həmin il “Qaya”nın yaranma ili hesab olunur”.

Rauf Babayev 1967-ci ildə Moskvada keçirilən ümumittifaq müsabiqəsində və digər musiqi yarışlarında birincilik əldə etmələrini, dünyanın əksər ölkələrində verdikləri konsertləri, qastrol səfərlərini yada salıb. “Eurovision” milli seçimlərində münsif olaraq təmsil olunan Rauf Babayev bu müsabiqə ilə bağlı fikrilərini də açıqlayıb və müsabiqənin SMS səsverməsi ilə keçirilməsindən narazılıq edib. Musiqiçinin fikrincə, belə bir seçim növü peşəkarlıq və obyektivlik baxımından düzgün deyil. Çünki məhz həmin səsverməyə görə, çox vaxt layiqli ifaçılar onluğa belə düşə bilmirlər.

Cavid İmamverdiyev isə sabahkı yubiley tədbiri barədə məlumat verib. Gecədə Gürcüstanın “Diela” kvarteti, Sərxan Sərxan və Azərbaycan sənətçiləri çıxış edəcəklər. Rusiyada yaşayan Lev Yelisavetskinin ürəyində cərrahiyyə əməliyyatı aparıldığından tədbirə gələ bilməyəcək, lakin tədbirdə onun ürək sözləri yazılmış video çarx nümayiş olunacaq.