İncəsənət

Ana səhifə

İncəsənət

İtaliyada Azərbaycan Mədəniyyəti Günlərinin başa çatması ilə bağlı mərasim olub - FOTOSESSİYA

İtaliyada Azərbaycan Mədəniyyəti Günlərinin başa çatması ilə bağlı mərasim olub - <font color=red>FOTOSESSİYA</font>

22 aprel 2012 13:44 (UTC +04:00)

Bakı – APA. Aprelin 21-də İtaliyada Azərbaycan Mədəniyyəti Günlərinin başa çatması ilə bağlı paytaxt Romadakı “Auditorium della Musika” konsert kompleksində mərasim olub. APA-nın “AzərTAc” dövlət agentliyinə istinadən verdiyi məlumata görə, Heydər Əliyev Fondunun, Azərbaycan Mədəniyyət və Turizm Nazirliyinin təşəbbüsü, ölkəmizin İtaliyadakı səfirliyinin və Roma şəhər meriyasının dəstəyi ilə keçirilən mərasimdə birinci xanım, Heydər Əliyev Fondunun prezidenti Mehriban Əliyeva və Fondun vitse-prezidenti Leyla Əliyeva da iştirak ediblər.

M. Əliyeva burada Roma şəhərinin meri Gianni Alemanno ilə görüşüb. Roma meri M. Əliyevanın fəaliyyəti barədə məlumatlı olduğunu deyib, ölkələrimiz arasında mədəni əlaqələrin inkişafının əhəmiyyətinə toxunub. Mer Bakı ilə Roma arasında yeni açılmış təyyarə reysinin ona Azərbaycan paytaxtını görmək üçün fürsət yaradacağını vurğulayıb.

M. Əliyeva Romada dahi Nizami Gəncəvinin abidəsinin ucaldılmasına verdiyi dəstəyə görə Gianni Alemannoya təşəkkürünü bildirib. İtaliyada Azərbaycan Mədəniyyəti Günlərinin keçirilməsindən məmnunluq ifadə edən birinci xanım bu cür tədbirlərin gələcəkdə də davam etdirilməsinin əhəmiyyətini vurğulayıb.

G. Alemanno Azərbaycanın birinci xanımına xatirə hədiyyəsi təqdim edib.

İtaliyada Azərbaycan Mədəniyyəti Günlərinin başa çatması ilə bağlı təşkil olunan mərasimin aparıcısı ölkəmiz, onun tarixi, mədəniyyəti barədə ətraflı məlumat verib.

Azərbaycanın İtaliyadakı səfiri Vaqif Sadıqov mədəniyyət günlərinin yüksək səviyyədə keçdiyini bildirib. Diplomat qədim tarixə malik Azərbaycan-İtaliya əlaqələrinin bu gün də uğurla inkişaf etdiyini, İtaliyanın ölkəmizin ən böyük ticarət tərəfdaşlarından biri olduğunu diqqətə çatdırıb. Ölkələrimiz arasında humanitar əlaqələrin əhəmiyyətinə toxunan səfir mədəniyyət günlərinin ikitərəfli münasibətlərin inkişafında mühüm rol oynayacağını vurğulayıb.

Mərasimdə çıxış edən Roma meri Gianni Alemanno da qədim tarixə söykənən Azərbaycan-İtaliya əlaqələrinin inkişafı ilə bağlı son dövrlərdə atılan addımların əhəmiyyətindən danışıb. Mer dahi Azərbaycan şairi və mütəfəkkiri Nizami Gəncəvinin Romada ucaldılan abidəsinin ölkələrimiz arasında mədəni əməkdaşlığa mühüm töhfə olduğunu vurğulayıb.

Sonra Azərbaycan incəsənət ustalarının iştirakı ilə möhtəşəm konsert proqramı təqdim edilib.

Konsertin ilk nömrəsi xalq artisti Afaq Məlikovanın rəhbərlik etdiyi Azərbaycan Dövlət rəqs ansamblının ifasında “Cəngi” rəqsi olub.

Sonra əməkdar artist Elnarə Kərimovanın rəhbərliyi ilə “Buta” kamera xorunun ifası, həmçinin “Sarı gəlin” xalq mahnısı, “Qarabağ yallısı”, “Novruz” ritmləri və Azərbaycanın bir-birindən maraqlı digər musiqiləri səslənib.

Qeyd edək ki, İtaliyada Azərbaycan Mədəniyyəti Günləri aprelin 16-da Turin şəhərinin italiyalıların qürur mənbəyi sayılan möhtəşəm Kariniano Teatrında start götürüb. Daha sonra Milan və Venesiya şəhərlərində keçirilən mədəniyyət tədbirlərinə son olaraq paytaxt Romada yekun vurulub.