İncəsənət

Ana səhifə

İncəsənət

Masallıda keçirilən uşaq-gənclər muğam ifaçılarının VI respublika müsabiqəsi başa çatıb

05 may 2012 14:43 (UTC +04:00)

Masallı. Ağəddin Babayev - APA. Mayın 1-dən Masallı şəhərində start götürən uşaq-gənclər muğam ifaçılarının VI respublika müsabiqəsi başa çatıb.

APA-nın cənub bürosunun məlumatına görə, Azərbaycan xalqının mədəni sərvətlərini qoruyub saxlamaq və inkişaf etdirmək, muğam sənətinə, xalq mahnıları və təsniflərə marağı artırmaq, yeni istedadlı muğam ifaçılarını aşkara çıxarmaq məqsədi daşıyan bu sənət yarışmasına ölkənin müxtəlif bölgələrindən olan 150 nəfərədək 13-25 yaşlı yeniyetmə və gənc qatılıb.

Respublikanın xalq artistləri Ağaverdi Paşayev (sədr), Səkinə İsmayılova, Zabit Nəbizadə, əməkdar artistlər Gülyaz Məmmədova, Gülüstan Əliyeva və Mədəniyyət və Turizm Nazirliyinin məsul işçisi Oqtay Muxtarovdan (üzvlər) ibarət münsiflər heyətinin yekdil qərarı ilə Tural Məmmədov (Ağcabədi), Vüsalə Bodurova (Balakən), Murad Kərimzadə (Füzuli), Hacıbaba Əbdürrəhmanov, Fəqan Bağırov (Qəbələ), Gülnar Ələkbərli, Gülzar Fərəcova, Hənifə Hüseynova, Amil Şıxəliyev (Sumqayıt), Səxavət Əsədullazadə, Ruhan Həzizadə (Astara), İsa İsmayılov (Masallı), Səbuhi Abdullazadə (Şirvan), Cahangir Əliyev (Lerik) və Asya Məmmədova (Qubadlı) müsabiqənin qalibləri elan olunub. Onlara Mədəniyyət və Turizm Nazirliyi tərəfindən fəxri fərmanlar, diplomlar və pul mükafatları təqdim edilib.