İnfrastruktur

Ana səhifə

İnfrastruktur

Bu həftə «Bakı şəhərində Nəqliyyatın İntellektual İdarəetmə Sistemi» Layihə İdarəetmə Qrupunun ilk iclası keçiriləcək

22 sentyabr 2008 14:55 (UTC +04:00)

Bakı. Rəşad Süleymanov – APA-Economics. Sentyabr ayının 26-da «Bakı şəhərində Nəqliyyatın İntellektual İdarəetmə Sistemi» Layihə İdarəetmə Qrupunun ilk iclası keçiriləcək. Bu barədə «APA-Economics»ə açıqlamasında Nəqliyyat Nazirliyi nəqliyyat siyasəti və iqtisadiyyat şöbəsinin müdiri Sədrəddin Məmmədov məlumat verib.
S.Məmmədovun sözlərinə görə, iclasda layihənin başlanmasına hazırlıq, görülən işlər və sənədləşmə ilə bağlı məsələlərin müzakirəsi və müvafiq qurumlara tapşırıqların verilməsi nəzərdə tutulur.
Layihə İdarəetmə Qrupuna Nəqliyyat Nazirliyi, Dövlət Yol Polisi, həmçinin sistemi quracaq Koreyanın «SK C&C Co. Ltd.» şirkətinin nümayəndələri daxildir.
S.Məmmədov «Bakı şəhərində Nəqliyyatın İntellektual İdarəetmə Sistemi» Layihəsi üzrə işlərə oktyabrın 8-də başlanacağını da bildirib. Bu məqsədlə «SK C&C Co. Ltd.» şirkətinin vitse-prezidenti də Bakıya gələcək.
Qeyd edək ki, «Nəqliyyatın İntellektual İdarəetmə Sistemi» vasitəsi ilə Bakı şəhəri və Abşeron yarımadasının bir hissəsində avtonəqliyyat vasitələrinin, marşrutlarda avtobusların hərəkətinin idarə olunması və s. həyata keçiriləcək. İdarəetmə Mərkəzində hər marşruta gündəlik nə qədər avtobusun çıxarılması, avtobuslar arasındakı məsafə, dayanma və hərəkət qrafiki, avtobuslarda sərnişinlərin sayı və s. nəzarət olunacaq. Bu sistemin məlumatları həm TV, həm də radionun imkanlarından istifadə olunmaqla yayımlanacaq. Bunun üçün ayrıca radiokanal və telekanal tezlikləri alınacaq. Həmçinin, mobil telefonlar vasitəsi ilə də şəhərin küçələrində vəziyyəti öyrənmək mümkün olacaq.
Xatırladaq ki, Azərbaycan Nəqliyyat Nazirliyi ilə Koreyanın Tikinti və Nəqliyyat Nazirliyi arasında intellektual nəqliyyat sistemi sahəsində əməkdaşlıq üzrə anlaşma memorandumu 2007-ci ilin aprelində imzalanıb. Sənəd çərçivəsində Cənubi Koreya Bakı şəhərində nəqliyyatın intellektual idarəetmə sisteminin yaradılmasında Azərbaycana köməklik göstərəcək. Layihənin ilkin dəyəri 50-55 mln. ABŞ dolları həcmində qiymətləndirilir.