İnfrastruktur

Ana səhifə

İnfrastruktur

Abşeronun telefon sistemində NGN şəbəkəsinin qurulmasına başlanılıb

07 noyabr 2008 12:37 (UTC +04:00)

Bakı. İlhamə İsabalayeva – APA-Economics. Azərbaycan Rabitə və İnformasiya Texnologiyaları Nazirliyinin «Aztelekom» İstehsalat Birliyi Abşeronun telefon sistemində NGN (Next Generation Network) şəbəkəsinin qurulmasına başlayıb.
«Aztelekom» İB-nin texniki direktoru Zahir Vəliyev «APA-Economics»ə bildirib ki, yeni şəbəkənin qurulması 2008-ci ilin sonuna kimi başa çatdırılacaq. Bu işləri Azərbaycanın «Komplas» şirkəti yerinə yetirir. Şəbəkə qurulduqdan sonra Abşeronun mövcud 29 792 nömrə tutumu artaraq 50 136-ya çatacaq. Hazırda isə Gəncə və Sumqayıtın telefon şəbəkəsinin yeni NGN şəbəkəsi üzərində qurulması üçün işlər görülür. Yeni şəbəkənin hesabına Gəncənin mövcud 52 600 nömrə tutumu 60 888-ə, Sumqayıtın mövcud 54 348 nömrə tutumu isə 67 552-yə çatdırılacaq.
Qeyd edək ki, «Aztelekom» Azərbaycanın regionlarında ilk dəfə NGN texnologiyasını Şamaxıda tətbiq edib. «Elektron Azərbaycan»ın kiçik modeli kimi reallaşdırılan «Elektron Şamaxı» layihəsinin həyata keçirilməsi nəticəsində Şamaxı rayonunun mərkəzində və 23 kənd yaşayış məntəqəsində quraşdırılmış NGN şəbəkəsi ötən ilin sonunda əhalinin istifadəsinə verilib.
NGN texnologiyası istifadəçilərə İP-TV, video telefon, İnternetə sürətli qoşulma ilə yanaşı, əlavə 21 növ servis xidmətlərindən istifadə etmək imkanı verir. Bura çıxış zənglərinin məhdudlaşdırılması, nömrənin bağlanması, zəngli saat, giriş zənglərinin məhdudlaşdırılması, birbaşa yönəltmə, cavab olmayanda yönəltmə, məşğulluq zamanı yönəltmə, ikinci zəngin qəbulu, nömrənin məşğulluğu zamanı məşğulluq bitdikdə hər iki tərəfə zəng göndərilməsi, 3 və 64 nəfərlik konfrans rabitə, konfrans rabitə zamanı ikinci zəngin qəbulu, nömrənin təyin edilməsi, nömrənin gizlədilməsi, ehtiyatda olan nömrə gizlətmə və s. xidmətlər aiddir.