İnfrastruktur

Ana səhifə

İnfrastruktur

Azərbaycanda dövlət əmlakının idarə edilməsinin informasiya sistemi qurulacaq

17 noyabr 2008 10:40 (UTC +04:00)

Bakı. Nicat Mustafayev – APA-Economics. Dünya Bankının (DB) Azərbaycanda «Daşınmaz əmlakın qeydiyyatı Layihəsi»nin icrasına nəzarəti həyata keçirmək məqsədilə Bakıya gələn missiyasının səfəri başa çatıb.
Dövlət Əmlakının İdarə Edilməsi üzrə Dövlət Komitəsindən (DƏİEDK) «APA-Economics»ə verilən məlumata görə, səfər çərçivəsində layihənin icrası ilə bağlı komitənin fəaliyyət dairəsinə aid dövlət əmlakının idarə edilməsi və registri sahəsində yeni sistemlərin yaradılması, komitənin informasiya-kommunikasiya sisteminin hazırlanması, regional ofislərin təmiri kimi məsələlər müzakirə edilib. DƏİEDK və DB-nın nümayəndələrinin görüşü çərçivəsində qeyd olunub ki, bu layihənin əsas məqsədlərindən biri dövlətə məxsus daşınmaz əmlakın idarə edilməsi və istifadəsi sahəsində şəffaf və səmərəli sistemlərin yaradılması, habelə daşınmaz dövlət əmlakının vahid və mərkəzləşdirilmiş qeydiyyatı sisteminin təkmilləşdirilməsidir. Belə ki, layihə çərçivəsində komitədə dövlət əmlakının qeydiyyatı ilə bağlı fəaliyyətdə olan Milli Avtomatlaşdırılmış Əmlak Sisteminin yeniləşdirilməsi, sistemin əməliyyatlar siyahısının genişlənməsi, yeni texniki vəzifələrin icrası, habelə, texniki və proqram təminatının modernləşdirilməsi, digər dövlət orqanları ilə avtomatlaşdırılmış informasiya əlaqələrinin qurulması işləri aparılacaq.
Həmçinin, dövlət əmlakının idarə edilməsinin informasiya sisteminin qurulması da nəzərdə tutulur. Burada komitənin bütün yerli ofisləri, tabeli qurumları və mərkəzi aparatı arasında bütün idarəetmə proseslərini (və ya biznes prosseslərini) özündə birləşdirən İKT sistemi yaradılacaq. Bunun üçün mükəmməl proqram təminatı və şəbəkə sistemi hazırlanacaq, yeni texnologiyalar və texniki avadanlıqlar əldə ediləcək.
Bundan başqa, keçirilən görüşlərdə komitənin institusional potensialının gücləndirilməsi və inzibatçılığın təkmilləşdirilməsi sahəsində də həyata keçiriləcək işlər ətrafında fikir mübadiləsi aparılıb və bildirilib ki, komitənin regional ofislərinin təmiri, bəzi inventarlaşdırma və ölçmə avadanlıqlarının alınması, inzibatçılıq proseslərinin (sənəd dövriyyəsi, kadr, mühasibat sənədləşmələri və s.) avtomotlaşdırılması, komitənin inkişaf strategiyası, elektron sənəd dövriyyəsi sisteminin qurulması məsələləri dəstəklənəcək.
Layihə çərçivəsində kadrların peşəkarlıq səviyyəsinin artırılması məsələləri də müzakirə olunub. Belə ki, layihə çərçivəsində komitədə insan resurslarının inkişafı məqsədilə personal üçün geniş treninq proqramları, seminarlar və təlim səfərləri nəzərdə tutulur. «Daşınmaz əmlakın qeydiyyatı Layihəsi»nin tətbiqi nəticəsində dövlət əmlakının operativ və səmərəli idarəetmə mexanizminin qurulması, bu sahədə dövlətin gəlirlərinin və sosial faydaların artırılmasına nail olunacaq.
Qeyd edək ki, ötən ilin noyabr ayında Bakıda səfərdə olan missiya üzvləri 2007-ci ilin sonuna qədər əldə edilmiş nəticələr haqqında müsbət rəylə çıxış edərək layihənin icrası prosesinin sürətləndirilməsi, səmərəliliyin artırılmasına dair bir sıra tövsiyə irəli sürüblər.
Xatırladaq ki, icrasına bir il öncə başlanmış «Daşınmaz əmlakın qeydiyyatı Layihəsi» təxminən 4-5 ili əhatə edir. Layihənin icrası məqsədi ilə IBRD (Dünya Bankı qrupunun üzvü) Azərbaycan hökumətinə 20 il müddətinə 25 mln. ABŞ dolları həcmində kredit ayırıb.