İnfrastruktur

Ana səhifə

İnfrastruktur

Bu ilin 9 ayında “Azerfon”un müştəri bazası 11%, gəlirləri 25% artıb

04 noyabr 2011 09:21 (UTC +04:00)

Bakı - APA-Economics. Azərbaycanda ilk 3G provayderi olan Azerfon MMC 3 noyabr 2011-ci il tarixdə doqquz aylıq fəaliyyət nəticələrini açıqlayıb.

Şirkətdən “APA-Economics”ə verilən məlumata görə, hesabat dövründə “Azerfon”un müştəri bazası 11%, gəlirləri isə 25% artıb. “Müştəri Xidmətləri”ndə bir sıra yeniliklər müştəri məmnuniyyətini 85%-a qaldırıb, “Müştəri Xidmətləri”nə zənglərin orta gözləmə vaxtı isə 1 dəqiqədən az təşkil edir.

“Bizim ən sərfəli qiymətlərimiz, keyfiyyətli müştəri xidmətləri və 3G xidmətlərindən istifadənin genişlənməsi bazar payımızın artmasına və 2011-ci ilin doqquz ayı ərzində gəlirlərimizin 25% artmasına səbəb olub” - deyə “Azerfon”un baş icraçı direktoru Yurgen Pitz bildirib.

Onun sözlərinə görə, şirkət hər zaman bazarda ən sərfəli qiymətlər və şəffaf qiymət siyasəti ilə seçilib: “Rəqiblərimizdən fərqli olaraq, biz istehlakçıları çaşdıran konturlardan heç zaman istifadə etməmişik. Rəqiblərimizlə müqayisədə bizim bütün istiqamətlərə zənglərdə və rouminq xidmətlərində ən sərfəli qiymətlərimizin olması, eləcə də keyfiyyətli müştəri xidmətləri abonentlərimizin “Nar Mobile”ı seçməsinin əsas səbəbidir. 2011-ci ildə 3G istifadəçilərinin sayı dörd dəfəyə qədər artıb və hazırda 120 000 abonent müntəzəm olaraq data xidmətlərindən istifadə edir. 2011-ci ildə keçirilən müstəqil araşdırmalar Azərbaycanda Nar Mobile tərəfindən təklif olunan 3G xidmətlərinin orta sürətinin Böyük Britaniyada oxşar xidmətlərin orta sürətindən daha yüksək olduğunu göstərdi. Hal-hazırda biz şəbəkəmizin əhatə dairəsini ən müasir avadanlıqlarla genişləndiririk. Şəbəkə müasirləşdirilməsi tezliklə başa çatdırıldıqdan sonra müştərilərimiz mükəmməl rabitə xidmətlərindən istifadə edəcəklər”.

Qeyd etmək lazımdır ki, “Azerfon” mövcud şəbəkəsini əhəmiyyətli dərəcədə genişləndirmək və müasirləşdirmək üçün 65 mln. dollar sərmayə qoyub. Dünyanın aparıcı şəbəkə avadanlığı istehsalçısı olan Almaniyanın “Nokia Siemens Networks” (NSN) şirkəti şəbəkənin genişləndirilməsi üzrə “Azerfon”un əsas tərəfdaşıdır. Müqaviləyə əsasən, NSN “Azerfon”un şəbəkəsini ən müasir avadanlıqlarla təchiz edərək 2G və 3G stansiyalarının sayını əhəmiyyətli dərəcədə artıracaq, metro stansiyalarına şəbəkəni genişləndirəcək və tezliklə abunəçilər ən mükəmməl rabitə xidmətlərindən istifadə edəcəklər.