İnfrastruktur

Ana səhifə

İnfrastruktur

Bu il Azərbaycanda nəqliyyat sektoruna 2,1 mlrd. dollar investisiya qoyulub - FOTOSESSİYA

Bu il Azərbaycanda nəqliyyat sektoruna 2,1 mlrd. dollar investisiya qoyulub - <font color=red>FOTOSESSİYA</font>

11 noyabr 2011 11:09 (UTC +04:00)

Tiflis. Nizami Məmmədzadə - APA. Tiflis (Gürcüstan) şəhərində keçirilən “Cənubi Qafqazda nəqliyyatın inkişaf perspektivləri” mövzusunda beynəlxalq konfransda Azərbaycan da iştirak edir. APA-nın Gürcüstan bürosunun məlumatına görə, bu gün Azərbaycan və donor təşkilatlarının nümayəndələri arasında görüş olub.

Tədbirdə çıxış edən Azərbaycan Nəqliyyat Nazirliyinin aparat rəhbəri Cavid Nəcəfov ölkədə dövlət investisiyaları hesabına və beynəlxalq maliyyə institutlarının kredit resurslarını cəlb etməklə nəqliyyat infrastrukturunun, o cümlədən beynəlxalq nəqliyyat dəhlizləri və nəqliyyat vasitələri parkının modernləşdirildiyini bildirib. O, 2010-cu ildə nəqliyyat sektoruna 3,1 mlrd. dollar sərmayə qoyulduğunu, bunun iqtisadiyyatın bütün sahələrinə yönəldilən ümumi investisiyanın 24,5%-ni təşkil etdiyini qeyd edib: “2011-ci ildə bu göstərici 2,1 mlrd. dollar təşkil edib ki, bu da ümumi investisiyanın 21,5%-ni təşkil edir. Respublikanın nəqliyyat sisteminin beynəlxalq nəqliyyat sisteminə inteqrasiyası məqsədilə biz prioritet istiqamətlər müəyyənləşdirmişik. Bunlardan ən vacibi ölkədən keçən beynəlxalq dəhlizlərin infrastrukturlarını inkişaf etdirmək və nəqliyyatda təhlükəsizliyi təmin etməkdir”.

C.Nəcəfov Azərbaycanın avtomobil yolları haqqında da donor təşkilatlara məlumat verib: “Azərbaycanda avtomobil yollarının uzunluğu 18 946 km təşkil edir. Bunun 1 915 km-i beynəlxalq, 14 315 km isə yerli əhəmiyyətli yollardır. Son 6 ildə Azərbaycanda 5 min km yol tikilib və reabilitasiya olunub. Bu gün yolların tikintisi davam edir və 870 km sahədə işlər sürətlə aparılır. Qeyd edim ki, TRACECA dəhlizi yollarının tikintisi və rekonstruksiyası 2013-cü ildə başa çatacaq. Azərbaycan dəmiryolunun şərq-qərb istiqamətinə uzanan xətlərinin rekonstruksiyası, yeni lokomotivlərin alınması, yeni layihələrin həyata keçirilməsi üçün Dünya Bankı 450 mln. dollar və 215 mln. avro ayırıb”.

Bu saatlarda hökumət nümayəndələrinin və donor təşkilatların iştirak etdiyi beynəlxalq konfrans “Dəmiryolunun idarə edilməsi: Effektivliyi yüksəldən müxtəlif strategiyalar” mövzusunda davam edir. Qapalı keçirilən tədbirə jurnalistlər buraxılmayıb. Beynəlxalq konfransda Gürcüstanın regional inkişaf və infrastruktur naziri Ramaz Nikolaişvili yekun sözü ilə çıxış edəcək.

Qeyd edək ki, tədbirdə Asiya İnkişaf Bankı (ADB), Avropa İnvestisiya Bankı (EİB), Beynəlxalq Maliyyə Korporasiyası (İFC), Dünya Bankı, Ümumdünya Yenidənqurma və İnkişaf Bankının, eləcə də digər donor təşkilatların nümayəndələri iştirak edirlər.