İnfrastruktur

Ana səhifə

İnfrastruktur

«Airbus» və «Boeing» şirkətlərinin hər biri 20 mlrd. dollarlıq müqavilələr imzalayıb

17 noyabr 2011 11:04 (UTC +04:00)

Bakı. Nicat Mustafayev - APA-Economics. Dubayda keçirilən aviasiya sərgisində dünyanın iki nəhəng təyyarə istehsalçısı olan Almaniyanın «Airbus» və ABŞ-ın «Boeing» şirkətlərinin hər biri dəyəri 20 mlrd. ABŞ dolları təşkil edən müqavilələr imzalayıb.

«APA-Economics»in məlumatına görə, aviasalon çərçivəsində «Airbus» şirkəti ümumi dəyəri 20,5 mlrd. dollar təşkil edən 211 sifariş alıb. «Airbus»un əsas rəqibi olan «Boeing» şirkətinə daxil olan sifarişlərin həcmi isə təxminən 20 mlrd. dollar olub.

«Airbus»un aldığı sifarişlərə 130 ədəd ensiz füzelyajlı «A320neo» və 5 ədəd «A380» təyyarəsinin istehsalı daxildir ki, müqavilələrin ümumi dəyəri 13,7 mlrd. dollar təşkil edir. Eyni zamanda şirkət 76 laynerin təchizatına dair ümumi dəyəri 6,8 mlrd. dollar olan memorandumlar imzalayıb.

Aviasalon zamanı «Airbus»a daxil olan ən iri sifariş «Qatar Airways» şirkətinə məxsusdur. Aviaşirkət «Airbus»dan 5 ədəd «A320neo» və 5 ədəd «A380» təyyarəsi alacaq ki, müqavilələrin ümumi dəyəri 6,4 mlrd. dollar təşkil edir. Bundan başqa, ALAFCO və ACG lizinq şirkətləri «Airbus»la müvafiq olaraq 50 və 30 ədəd «A320neo» avialaynerin alınmasına dair ümumi dəyəri 7,3 mlrd. dollar təşkil edən müqavilələr imzalayıb.

Öz növbəsində «Spirit Airlines» şirkəti ilə «Airbus» arasında 75 «A320» təyyarəsinin alınmasına dair ümumi dəyəri 6,7 mlrd. dollar təşkil edən ilkin müqavilə imzalanıb. «Comlux The Aviation Group» şirkəti isə «Airbus»la qiyməti 99,7 mln. dollar olan «ACJ321» işgüzar təyyarənin alınmasına dair saziş imzalayıb.

«Airbus» şirkətinin hesablamalarına əsasən, 2011-ci ildə şirkət «A320neo» təyyarəsinə 1 300 sifariş alıb. Sözügedən təyyarə bu sinfə aid olan digər təyyarələrdən yanacağa 15% qənaəti, yükqaldırma qabiliyyətinin 2 ton, uçuşun məsafəsinin isə daha 800 km artırılması ilə fərqlənir.

Öz növbəsində «Boeing» şirkəti Dubay aviasalonunda özünün fəaliyyəti tarixində ən iri sifariş alıb. Belə ki, «Emirates Airlines» aviaşirkətindən «Boeing»a 50 ədəd «Boeing 777-300» təyyarənin alınmasına dair sifariş daxil olub ki, müqavilənin ümumi dəyəri 18 mlrd. dollar təşkil edir. Bununla yanaşı, «Emirates Airlines» şirkəti «Boeing»a 20 təyyarə üçün əlavə avadanlıq və funksiyaların tətbiqinə dair ümumi dəyəri 8 mlrd. dollar təşkil edən sifariş verib.

Bundan öncə «Boeing»in ən iri «Boeing-777» təyyarələrinə «Singapore Airlines» və «Air France» şirkətləri malik idi. Sözügedən sifariş tam yerinə yetirilərsə, «Emirates Airlines» bu şirkətlərin hər ikisini arxada qoyacaq.

Bundan başqa, «Oman Air» və «Boeing» arasında 6 ədəd «Boeing 787-8» təyyarəsinin alınmasına dair saziş imzalanıb. «Qatar Airways» isə «Boeing»dən daha 2 ədəd «Boeing-777» yük təyyarəsi alacaq ki, bunun da ümumi dəyəri 560 mln. dollar təşkil edir. «Qatar Airways»in parkında bu təyyarədən artıq 6 ədədi mövcuddur.

Ümumiyyətlə, 2011-ci ildə «Boeing» konserni «Boeing-777» modelinə 182 sifariş alıb. Sonuncu dəfə şirkət analoji müvəffəqiyyətə 2005-ci ildə nail olub ki, həmin il «Boeing» sözügedən modelin istehsalı üçün 154 sifariş alıb.

Qeyd edək ki, «Boeing-777» təyyarəsinin sərnişin tutumu 365, uçuş məsafəsi 14,7 min km təşkil edir. Sərnişin təyyarələri arasında birbaşa uçuşun uzaqlığına görə bu model rekord vurub - 21 061 km.