İnfrastruktur

Ana səhifə

İnfrastruktur

“Azercell” şirkəti 3G xidmətlərinin göstərilməsinə başlayıb

18 noyabr 2011 10:21 (UTC +04:00)

“APA-Economics”in xəbərinə görə, bununla əlaqədar keçirilən tədbirdə çıxış edən şirkətin prezidenti Ali Ağan qeyd edib ki, 3G xidməti ölkənin bütün ərazisini əhatə edir.

“3G vasitəsilə abonentlər 7,2 Mbit/saniyə sürətə malik mobil internetdən istifadə edə biləcəklər. Bu isə hazırda istifadə olunan 2G texnologiyasından 20 dəfə artıq sürət deməkdir. Bakı və Azərbaycanın bəzi ərazilərində 3G sürətin hətta 21 Mbit/saniyəyə çatacaq” - deyə A.Ağan qeyd edib.

Azərbaycan rabitə və informasiya texnologiyaları nazirinin müavini İltimas Məmmədov isə xatırladıb ki, “Azercell”ə lisenziya bu il noyabrın 2-də verilib: “3G vasitəsilə bir çox elektron xidmətlərdən istifadə etmək mümkün olacaq, mobil internet istifadəçilərinin sayı bir qədər də artacaq”. İ.Məmmədov yaxın günlərdə “Bakcell” şirkətinin də 3G xidmətlərinin göstərilməsinə başlayacağını söyləyib.

Tədbirdə həmçinin qeyd olunub ki, 3G tariflərində 60%-dək endirimlər olacaq. 1 MB üçün fakturalı və fakturasız xətt abonentləri 40 qəpik, “GəncSim” tarifinə qoşulan abonentlər isə 20 qəpik ödəyəcəklər. 3G vasitəsilə videozəng etmək mümkün olacaq ki, bunun da qiyməti səsli zəngin qiymətinə bərabər olacaq.

3G xidmətini aktivləşdirmək pulsuzdur. Bunun üçün 2525 qısa nömrəsinə 3G mətni yazıb göndərmək kifayətdir. 3G xidməti vasitəsilə videozənglər etmək, cib telefonu vasitəsilə TV-yə baxmaq, hadisə yerindən canlı yayım aparmaq, böyük həcmli videofaylları telefon vasitəsilə göndərmək mümkün olacaq. Eləcə də uzaqdan səhiyyə xidmətləri göstərmək, nağd pul daşımadan hər cür alış-veriş aparmaq, kommunal xərclərin ödənilməsi və bir çox bank əməliyyatlarını telefondan həyata keçirmək imkanı yaranacaq.

“Mobile TV” vasitəsilə 8 telekanala (İTV, “Akıllı TV”, TV1000, “Nickelodion”, MTV, “İdman-Azərbaycan”, “Euronews”, “Discovery World”) baxmaq mümkün olacaq. Bunun 1 saatı 1 manat, 3 saatı 2 manat, 1 günü 4 manat, 7 günü 10 manatdır.

“Azercell” 3GMAX modeminin hədiyyə kampaniyasını da keçirəcək.