İnfrastruktur

Ana səhifə

İnfrastruktur

«Bakcell» yeni xidmətlərin tətbiqinə başlayıb

19 noyabr 2011 10:37 (UTC +04:00)

Bakı. Əli Əhmədov – APA-Economics. Azərbaycanın ilk mobil rabitə operatoru olan «Bakcell» şirkəti Bakı şəhərinin mərkəzində özünün yeni - «Sharks Mobile» diler mağazasını açıb. Nizami küçəsi,48 ünvanında yerləşən mağaza «Cin», «Klass» və «Gold» abunəçiləri üçün tam çeşiddə xidmətlər təqdim edəcək. Bununla yanaşı, yeni mağaza digərlərindən daxili və xarici tərtibatı, eləcə də göstərəcəyi yeni xidmətlərlə fərqlənəcək.

Belə ki, abunəçilər yeni mağazada planşet və telefonların yeni modellərini sınaqdan keçirə biləcəklər. «Sharks Mobile» mağazası «Bakcell» abunəçilərinə yalnız şəxsiyyət vəsiqəsini təqdim etməklə ilkin ödənişsiz 6 aylıq kreditlə telefon, planşet və noutbuklar əldə etmək imkanı verəcək. Mağazadan «Bakcell» nömrəli yeni telefon alan müştəriləri də sürpriz gözləyir. Alış-veriş zamanı onlara mağazada hər şənbə oynanılacaq uduş kuponu təqdim olunacaq. Uduş zamanı hər həftə bir alıcı «Nokia X6» və «Bakcell» nömrəsi qazanacaq.

Mağazanın ən maraqlı xüsusiyyəti onun tərtibatı ilə bağlıdır. Mağazanın daxilində quraşdırılan «touch screen» (sensorlu) monitor vasitəsilə müştərilər almaq istədikləri nömrəni axtarıb tapa biləcəklər. Axtarış verildikdən sonra ekranda abunəçinin arzuladığı və ya ona bənzər nömrələr görünəcək. Digər yenilikdən isə təkcə mağazanın daxilində olanlar deyil, ondan kənardakılar da istifadə edə biləcək. Belə ki, Böyük Britaniya texnologiyasından istifadə edərək Azərbaycanda ilk dəfə «touch screen foil» (sensorlu pəncərə) quraşdırılıb. Bu, xüsusi lent vasitəsilə sensor ekran funksiyasını yerinə yetirəcək adi şüşədir. Onun vasitəsilə «Bakcell» öz internet səhifəsini bəzi diler mağazaları və servis mərkəzlərinin çöl pəncərəsinə ötürə biləcək. Bu texnologiya sutkanın 24 saatı aktiv olacaq və abunəçilərə şirkətin internet səhifəsindən istifadə edərək «055» jurnalının yeni buraxılışları ilə tanış olmaq, onlayn ödəmələr həyata keçirmək, tarif və kampaniyalar haqqında məlumat almaq, pulsuz SMS göndərmək imkanı verəcək.

Həmçinin, yaxın vaxtlarda abunəçilərin «touch screen» vasitəsilə «Skype»dan istifadə edərək «Bakcell»in Məlumat Mərkəzlərinə onun qoşulması da planlaşdırılır.

Qeyd edək ki, mağazaya fəaliyyətə başlayandan sonrakı ilk 3 gün ərzində baş çəkən müştərilərə hədiyyələr paylanacaq.