İnfrastruktur

Ana səhifə

İnfrastruktur

Ötən il Azərbaycanda əsas kapitala sərmayə qoyuluşu 27% artıb

19 yanvar 2012 10:26 (UTC +04:00)

Bakı. Nicat Mustafayev – APA-Economics. Ötən il ərzində bütün maliyyə mənbələrindən Azərbaycanda əsas kapitala 12,8 mlrd. manat və ya əvvəlki ildəkindən 27,3% çox vəsait yönəldilib.

Dövlət Statistika Komitəsindən «APA-Economics»ə verilən məlumata görə, vəsaitin 80,3%-i daxili mənbələr hesabına təmin edilib. Sərf edilmiş sərmayələrin 43,1%-i məhsul istehsalı, 56,9%-i xidmət sahələri obyektlərinin inşasında istifadə olunub. Dövlət mülkiyyətli müəssisə və təşkilatlar tərəfindən əsas kapitala yönəldilmiş vəsait ümumi sərmayənin 58,6%-ni təşkil edib: «Hesabat ilində regionların sosial-iqtisadi inkişafı Dövlət Proqramı çərçivəsində bir sıra yeni tikili və obyektlər işə salınıb, yeni iş yerləri açılıb. Bakı şəhərində «Hilton Bakı», «Kempinski Badamdar» və «Jumeirah Bilgah Beach Hotel» kompleksləri, Müalicə-Diaqnostika Mərkəzi, «Dərnəgül» metro stansiyası və tikinti materialları zavodu, Sumqayıt şəhərində Olimpiya İdman Kompleksi, Gəncə şəhərində Fiziki qüsurlu insanlar üçün Regional İnformasiya Mərkəzi, Naftalan şəhərində «Çinar Hotel və SPA Naftalan» və «Qaşaltı» sanatoriya kompleksləri, Xızı rayonunda Müalicə-Diaqnostika Mərkəzi, Abşeron rayonunda Mebel fabriki və AzMDF zavodu, Ağsu rayonunda şirə və şərab istehsalı zavodu, çörək zavodu və şəhər stadionu, Samux rayonunda meyvə qurudulması və emalı müəssisəsi, Ağcabədi rayonunun Ağabəyli kəndində «Atena» süd istehsalı və emalı kombinatı, Ağcabədi şəhərində süd emalı zavodu, Ağcabədi-Qaradolaq-Kəbirli avtomobil yolu (24,5 km-lik hissəsi), şahmat məktəbi, İmişli rayonunda qarışıq yem və bitki yağları fabrikləri istifadəyə verilib, İmişli-Qaravəlili-Mirili avtomobil yolunun yenidən qurulub (12 km), olimpiya idman kompleksi, Araz çayının yeni qolunun üzərində körpü (230 metr), Qəbələ rayonunda beynəlxalq aeroport, olimpiya idman kompleksi, limonad zavodu və «Qafqaz Sport Hotel» mehmanxanası, Şəki rayonunda şərab zavodu, «Green Hill İnn» mehmanxanası, Qax rayonunda avtovağzal Kompleksi, «El Resort» mehmanxanası, Oğuz rayonunda qarğıdalı emalı zavodu və qlükoza istehsalı müəssisəsi, Ucar rayonunda şahmat məktəbi, Göyçay rayonunda meyvə və tərəvəz saxlamaq üçün soyuducu anbar, Qobustan rayonunda taxıl anbarı kompleksi və eksperimental poliqon və tədris mərkəzi, Quba rayonunda avtovağzal binası, şahmat məktəbi və Quba-Qəçrəş-Qımılqazma avtomobil yolu (22 km), Xaçmaz rayonunda kondensator zavodu yenidən qurulub və şahmat məktəbi istifadəyə verilib, Astara rayonunda qaz-kompressor stansiyası, Astara-Bala Şahağac avtomobil yolu (19 km-lik hissəsi), Tovuz rayonunda süd emalı zavodu, olimpiya idman kompleksi, Tovuz-Böyük Qışlaq-Qaralar avtomobil yolu (53 km), Qazax-Gürcüstan dövlət sərhədi avtomobil yolu (36 km), Kürdəmir-Ucar magistral avtomobil yolunun 42 km-lik hissəsi, Ağdaş-Ləki avtomobil yolu (12 km) yenidən qurularaq istismara verilib», - deyə Komitədən bildirilib.