İnfrastruktur

Ana səhifə

İnfrastruktur

Azərbaycan Rabitə və İnformasiya Texnologiyaları Nazirliyində kollegiya iclası keçirilib - FOTO

Azərbaycan Rabitə və İnformasiya Texnologiyaları Nazirliyində kollegiya iclası keçirilib - <font color=red>FOTO</font>

21 yanvar 2012 09:09 (UTC +04:00)

Bakı. Nicat Mustafayev - APAEconomics. Bu gün Azərbaycan Rabitə və İnformasiya Texnologiyaları Nazirliyində 2011-ci ilin yekunlarına dair kollegiya iclası keçirilib.

«APA-Economics»in məlumatına görə, tədbirdə çıxış edən rabitə və informasiya texnologiyaları naziri Əli Abbasov son illər İKT sektorunun davamlı inkişaf etdiyini, əldə edilən gəlirlərinin artdığını, sektorun iqtisadiyyatda rolunun getdikcə yüksəldiyini, göstərilən xidmətlərin keyfiyyətinin və çeşidinin artdığını bildirib və qeyd edib ki, 2011-ci ildə İKT, informasiya və poçt sektorunda əldə olunan gəlirlərin həcmi ötən ilin müvafiq dövrü ilə müqayisədə 13% artaraq 1 314,9 mln. manat təşkil edib: «Ötən illə müqayisədə artım tempi İKT sektorunda 12,8%, o cümlədən telekommunikasiya sektorunda 9,8%, İT sektorunda 1,4 dəfə, poçt sektorunda 5%, informasiya sektorunda isə 33% təşkil edib».

Nazir onu da qeyd edib ki, İKT, informasiya və poçt sahələrində əldə olunan gəlirlərin təxminən 75,3%-i özəl rabitə müəssisələrinin payına düşüb.

«Telekommunikasiya sektorunda əldə olunan gəlirlərin 66,8%-i mobil sektorun payına düşüb və əvvəlki illə müqayisədə mobil sektor üzrə real artım tempi 3,6% təşkil edib. Ötən il ərzində İKT, poçt və informasiya sektoru üzrə əldə olunan gəlirlərin ÜDM-də payı 1,8%, qeyri-neft ÜDM-də payı isə 3,7% təşkil edib», - deyə Ə.Abbasov bildirib.

Tədbirdə həmçinin qeyd olunub ki, 2011-ci ildə nazirliyin strukturuna daxil olan birlik və müəssisələr üzrə 302,5 mln. manat proqnoza qarşı 346,8 mln. manat gəlir əldə edilib, bu da proqnozla müqayisədə 14,6%, 2010-cu illə müqayisədə isə 24,9% çoxdur. Rabitə və İnformasiya Texnologiyaları Nazirliyinin strukturuna daxil olan birlik və müəssisələr tərəfindən 2011-ci ildə dövlət büdcəsinə 37 mln. manat, Dövlət Sosial Müdafiə Fonduna isə 15,6 mln. manat vəsait ödənilib.

Bundan başqa, 2011-ci ildə ölkənin rabitə sahəsini dünya standartları səviyyəsinə çatdırılması məqsədilə, Nazirliyin strukturuna daxil olan birlik və müəssisələr tərəfindən 144,5 mln. manat investisiya qoyuluşu həyata keçirilib. Ümumilikdə, 2011-ci ildə sektora 415 mln. manat investisiya qoyulub ki, 2010-cu ilə nisbətən bu göstərici 2 dəfə çoxdur və ölkə iqtisadiyyatına qoyulan vəsaitin 3,2%-ni təşkil edir. Sektora qoyulan investisiyaların 246,4 mln. manatı mobil rabitə operatorları, 144,5 mln. manatı isə Nazirliyin strukturuna daxil olan birlik və müəssisələr tərəfindən yatırılıb.

Qeyd edək ki, iclas çərçivəsində Rabitə və İnformasiya Texnologiyaları Nazirliyinin strukturuna daxil olan birlik və müəssisələrin rəhbərləri məruzələrlə çıxış edib, 2011-ci ildə həyata keçirilən işlər barədə məlumat veriblər. İclasın sonunda nazir Ə.Abbasov sözügedən birlik və müəssisələrin rəhbərlərinə müvafiq tapşırıqlarını verib.