İnfrastruktur

Ana səhifə

İnfrastruktur

Azərbaycan ilk süni rabitə peykinin orbitə çıxarılması ilə bağlı hazırlıq işlərini sürətləndirib

09 aprel 2012 08:01 (UTC +04:00)

Bakı. Nicat Mustafayev – APA-Economics. Azərbaycan Rabitə və İnformasiya Texnologiyaları Nazirliyinin «Azərkosmos» ASC ilk süni rabitə peykinin orbitə çıxarılması ilə bağlı hazırlıq işlərini sürətləndirir.

Nazirlikdən «APA-Economics»ə verilən məlumata görə, Azərbaycanda texnologiya tutumlu sahələrin inkişafı və peyk sənayesinin yaradılması işinə son illərdə başlanmasına baxmayaraq, «Azərkosmos» ASC-nin işçi heyətinə yüksəkixtisaslı kadrlar cəlb edərək, mütəmadi olaraq onların xaricdə ixtisasartırma məqsədilə müxtəlif təlimlər və kurslarda iştirakı təmin edə bilib.

Bununla yanaşı, «Azərkosmos» ASC bir sıra texniki və texnologiya yönümlü ixtisaslar üzrə təcrübəli mütəxəssislərin işə cəlb edilməsinə hər zaman böyük diqqət yetirir və maraqlanan namizədləri əməkdaşlıq etməyə dəvət edir.

«Bu ilin sonunda Azərbaycanın ilk telekommunikasiya peykinin orbitə çıxarılması nəzərdə tutulub və bu istiqamətdə işlər uğurla həyata keçirilir. Xatırladaq ki, «Azerspace» adlanan ilk peyk ABŞ-ın aparıcı peyk istehsalçısı olan «Orbital Sciences Corporation» şirkəti tərəfindən «STAR-2» platforması əsasında hazırlanır», - deyə nazirlikdən bildirilib.

Hazırda bu platforma üzərində yığılmış 22 peyk böyük müvəffəqiyyətlə istismar edilməkdədir. Peyk 2012-ci ilin son rübündə Cənubi Amerikada Fransa Qvianasında yerləşən Kuru kosmodromundan, Fransanın «Arianespace» şirkətinin öz yüksək etibarlılığı ilə seçilən «Ariane-5» raket daşıyıcısı ilə orbitə çıxarılacaq.

Peyk Malayziya hökumətinə məxsus «Measat Satellite Systems» şirkəti tərəfindən istifadə olunan və Azərbaycan hökumətinə icarəyə verilən 46 dərəcə Şərq uzunluq dairəsində, geostasionar orbitdə yerləşəcək və Şərqi Avropa, Şimali Afrika, Mərkəzi Asiya, o cümlədən Qafqaz və Yaxın Şərq regionuna yüksək keyfiyyətli yayım xidməti göstərəcək.

Peyk rəqəmli teleradio yayımı xidmətlərinin göstərilməsi, internet şəbəkəsinə çıxış, məlumatların ötürülməsi, «VSAT» multiservis şəbəkəsinin, eləcə də hökumət əlaqələrinin yaradılması üçün nəzərdə tutulub. Peykin orbitdə istismar müddətinin 15 ilə qədər təşkil etməsi gözlənilir.

Bu il orbitə buraxılacaq telekommunikasiya peyki ilə yanaşı, yaxın üç il ərzində iki digər peykin də istifadəyə verilməsi planlaşdırılır. İnformasiya kommunikasiya texnologiyalarının ölkə iqtisadiyyatının neftdən sonra ikinci əsas sahə elan olunduğu və bu sahənin iqtisadiyyatda xüsusi çəkisinin yüksələn xətlə inkişaf etdiyi nəzərə alındıqda, gələcəkdə Azərbaycanda bu sahəyə, xüsusilə kosmik sənayeyə olan marağın və mütəxəssislər üçün tələbatın çoxalacağı gözlənilir.