İnfrastruktur

Ana səhifə

İnfrastruktur

Prezident: “Bakıda yeni neft-kimya, neftayırma və qaz emalı zavodlarının qurulmasına qoyulan investisiya 10 milyard manatdan artıq ola bilər”

17 aprel 2012 01:10 (UTC +04:00)

APA-nın xəbərinə görə, bunu Nazirlər Kabinetinin bu ilin ilk rübünün yekunlarına həsr olunmuş müşavirədəki çıxışında Azərbaycan prezidenti İlham Əliyev bildirib

Prezidentin sözlərinə görə, yeni texnoparkların yaradılmasına özəl sektorun dəstəyi ilə nail olunacaq.

Kənd təsərrüfatı sahəsində ciddi işlər görüldüyünü deyən ölkə başçısı bu sahənin inkişafı üçün müasir texnologiyaların tətbiqinin vacibliyini qeyd edib. Bu sahədə aqroservislərin qurulmasına xarici investorların da maraq göstərdiyini vurğulayan prezident bu sahəyə yerli investorların da cəlb edilməsinin lazımlığını qeyd etməklə, yeni aqroservislərin yaradılması ilə bağlı təkliflərin hazırlanması barədə tapşırıq verib.

“Subsidiyalarla, dövlət tərəfindən verilən güzəştlərlə bağlı yeni təkliflər verilməlidir. Birinci mərhələdə biz kənd təsərrüfatını, xüsusilə taxılçılığı stimullaşdırmaq üçün bu subsidiyaları ayırdıq. Həm yanacağa, həm gübrələrə, eyni zamanda, əkilən məhsullara hektarbaşı subsidiyalar pul şəklində verilir. Bu, çox müsbət təşəbbüs idi və işgüzarlığın artmasına böyük təkan verdi. Mənim təklifim ondan ibarətdir ki, biz bu subsidiyaları daha da təkmilləşdirək. Söhbət ondan getmir ki, bunu azaldaq, yaxud da ki, aradan götürək. Yox, əksinə, söhbət ondan gedir ki, bunlar daha da səmərəli şəkildə işləsin. Bəlkə buna daha da böyük məbləğ ayrılsın. Ancaq verilən subsidiyalara görə nəticə daha da təsirli olsun. İndi subsidiyaların həcmi verilən nəticə ilə uyğun gəlmir. Nəticə daha da çox və təsirli olmalıdır” deyən ölkə başçısı əlavə təkliflər hazırlanması barədə göstəriş verib.

Ərzaq təhlükəsizliyi məsələsinə toxunan ölkə başçısı burda ərzağın keyfiyyətini də nəzərdə tutulduğunu bildirib: “Son zamanlar bu sahədə ciddi dönüş yaradılıb. Əvvəlki dövrdə deyə bilərəm ki, bu sahə ümumiyyətlə diqqətdən kənarda qalmışdı və yoxlamaları aparan qurumlar əfsuslar olsun ki, vəzifə borclarını layiqincə yerinə yetirmirdilər. Onların yoxlamaları formal xarakter daşıyırdı. Yaxud da ki, gedib hansısa yoxlamanın aparılmasından sonra onlar qanunsuz tələblərdə də iştirak edirdilər. Beləliklə, həm yerli, həm xarici keyfiyyətsiz məhsullar bizim bazarımızı bürümüşdü”.

Prezident bu sahədə həm bazar, həm də idxala nəzarətin güclü olmasının vacibliyini qeyd edib.

Prezident deyib ki, insan sağlamlığına təhlükə olan keyfiyyətsiz ərzaqlardan danışarkən, televiziya kanallarındakı mətbəx proqramlarına toxunmaya bilmir: “Bizim televiziyaların, demək olar ki, hamısı indi mətbəxlə, yeməklərin bişirilməsi, hazırlanması ilə bağlı verilişlər təqdim edirlər. Birincisi onu demək istəyirəm ki, bu da xaricdən gələn bir meyildir. O ölkələrdə ki, evlərdə yemək bişirilmir, onlar üçün bəlkə bu, daha da aktualdır. Azərbaycanda evlərdə bişirilən yemək, indi istənilən restorandan daha da yaxşıdır, ləzzətlidir. Amma bu, bir dəbdir, bizə də gəlib çatıb. Mən etiraz etmirəm, olsun. Ancaq bir şərtlə ki, orada göstərilən reseptlər və yeməklərin bişirilmə qaydaları insanların sağlamlığına mənfi təsir göstərməsin. Mən o verilişlərə hərdənbir baxıram və bəzi hallarda çox ürək ağrısı ilə görürəm ki, indi yağın içində üzən yeməklər təbliğ edilir. Axı olmaz. Bu yeməkləri gündə yeyən insan xəstələnəcək. Yəni, nə qədər gülməlidisə, bir o qədər də faciəvidir. Biz sağlam həyat tərzini təbliğ edirik, insanları pis vərdişlərdən çəkindiririk, idmanı təbliğ etdiyini, siqaret çəkənə müsbət münasibət ola bilməz. Alkoqollu içkilərə aludə olanlar qınaq obyektinə çevrilməlidir. Belə olan halda, bizim bəzi kanalların insanlara verdikləri təkliflər əlbəttə ki, çox məyusedicidir”.

Prezident özəl kanalların siyasətinə qarışmaq fikrində olmadığını deyib: “Ancaq məsləhət verə bilərəm ki, insan orqanizmi üçün sağlam reseptləri daha çox tətbiq etsinlər”.

Bu il məcburi köçkünlərin yaşayış səviyyəsinin yaxşılaşdırılması üçün Neft Fondundan 300 milyon manat vəsait ayrıldığını deyən prezident layihənin ilin sonuna qədər tam icra edilməsini tövsiyyə edib.
Bakının kənd və qəsəbələrinin inkişafı proqramının icrası ilə bağlı ayrıca toplantı keçiriləcəyini deyən ölkə başçısı proqramın 2013-cü ilin sonuna qədər icra edilməli olduğunu bildirib.

Enerji təhlükəsizliyi ilə bağlı məsələlərin Azərbaycanda uğurla həll edildiyini deyən ölkə başçısı bu məsələnin tərəfdaş ölkələrlə qarşılıqlı maraqlar və mənfəət əsasında həll ediləcəyini bildirib: “Bu gün Azərbaycan istər neft, istər qaz sahəsində çox önəmli, qlobal oyunçuya çevrilir, tərəfdaşlarımızın sayı artır. Əməkdaşlıq etdiyimiz ölkələrin sayı artmaqdadır”.

Prezident bildirib ki, enerji sahəsində fəaliyyət göstərən bütün qurumlar investisiyaları ilk növbədə Azərbaycana, daha sonra xarici bazarlara qoyulmalı olduğu bildirilib.

Dövlət başçısı qeyd edib ki, birinci rübdə Azərbaycan Dövlət Neft Şirkətinin layihələri olan Bakıda yeni neft-kimya, neftayırma və qaz emalı zavodlarının ilkin təqdimatı keçirilib: “Bu sahəyə qoyulan investisiya milyardlarla ölçülür. Bəlkə, 10 milyard manatdan da artıq ola bilər”.

Prezident yeni neftayırma zavodunun işə düşməsindən sonra uzun illər fəaliyyət göstərən iki neftayırma zavodunun fəaliyyətinin dayandırılacağını, yeni neft emalı zavodu tikiləcəyini, orda müasir ekoloji standartlara uyğun yanacaq istehsal ediləcəyini vurğulayıb: “İndiki zavodların əraziləri də abadlaşacaq. Çox güman ki, birinin ərazisi ümumi bulvarın genişlənməsinə veriləcək. Dənizkənarı zolağı biz Zığa qədər davam etdirmək fikrindəyik. O biri zavodun ərazisində də,- indi demək bəlkə də bir qədər tezdir,- hesab edirəm ki, yeni, gözəl parkın yaradılması yerinə düşər. Biz, ümumiyyətlə, şəhərdə yeni parkların, meşə zolaqlarının yaradılmasına nail oluruq, buna böyük ehtiyac var. Harada mümkündür park yaradılmalıdır”.

Prezident su və kanalizasiya layihələrinin icrasının bütün ölkə üzrə getdiyini və 2014-cü ildə başa çatdırılmasının vacibliyini qeyd edib. Şəhərlərin əkdəriyyətində kanalizasiya sistemi və su xəttinin, ümumiyyətlə, heç vaxt olmadığını deyən ölkə başçısı bu sistemlərin yaradıldığını bildirib. Onun sözlərinə görə, kəndlərdə də əhalinin təmiz su ilə təmin olunması üçün modul tipli sutəmizləyici qurğular quraşdırılmalıdır.