İnfrastruktur

Ana səhifə

İnfrastruktur

«Chezh Airlines» aviaşirkəti Karlovı Varı-Bakı birbaşa aviareysi açmaq niyyətindədir

11 may 2012 13:57 (UTC +04:00)

Bakı. Nicat Mustafayev – APA-Economics. «Chezh Airlines» aviaşirkəti Karlovı Varı-Bakı marşrutu üzrə birbaşa aviareys açmaq niyyətindədir. Bu barədə «APA-Economics»ə aviaşirkətin Rusiya və MDB ölkələri üzrə marketinq meneceri Marek Pavliş məlumat verib.

Onun sözlərinə görə, hazırda «Chezh Airlines» aviaşirkəti həftədə iki dəfə Praqa-Bakı aviareysini yerinə yetirir: «Bakıdan Praqaya uçuşları həftədə iki dəfə bizim aviaşirkət, həftədə 2 dəfə də «Azərbaycan Hava Yolları» (AZAL) aviaşirkəti yerinə yetirir. «Chezh Airlines» sözügedən aviareysi həftədə ən azı 4 dəfə yerinə yetirməlidir ki, daha sonra bu reyslərdən biri Bakıdan Karlovı Varaya istiqamətləndirilsin. Ümid edirəm ki, Karlovı Varı-Bakı marşrutu üzrə uçuşlara gələn il ərzində başlayacağıq».

Qeyd edək ki, «Chezh Airlines» aviaşirkəti Bakı-Praqa aviareysini hər həftənin III və VI günləri müvafiq olaraq saat 07:10-da və 03:10-da yerinə yetirir. Bundan öncə şirkət sözügedən aviareys üzrə uçuşları birbaşa yerinə yetirirdi. Hazırda isə Praqadan təyyarə Tbilisidən tranzit olaraq Bakıya gəlir.

Xatırladaq ki, «Chezh Airlines» aviaşirkətindən fərqli olaraq AZAL-ın Bakı-Praqa aviareysi birbaşadır. Hazırda AZAL Bakıda keçirilən «Eurovision-2012» mahnı müsabiqəsi ilə əlaqədar Bakıdan Praqaya uçuşları hər gün saat 08:40-da yerinə yetirir. AZAL-ın gündəlik uçuşları mayın 30-dək davam edəcək, daha sonra isə aviaşirkət uçuşları adi cədvəl üzrə, yəni hər həftənin I və V günləri həyata keçirəcək.

Qeyd edək ki, həm «Chezh Airlines», həm də AZAL-ın Bakı-Praqa-Bakı aviareysinə bir biletin minimal qiyməti 445 manata təşkil edir.