Azərbaycan Prezidenti İlham Əliyev və birinci xanım Mehriban Əliyeva mayın 2-də Ağdam şəhərinə səfər zamanı inzibati binanın, 2-ci və 3-cü yaşayış məhəllələrinin, Muğam Mərkəzinin və Ağdam Rəqəmsal İdarəetmə Mərkəzi və Təlim-Tədris Kompleksinin təməlini qoyub.
Prezidentin Qarabağ İqtisadi Rayonu üzrə xüsusi nümayəndəsinin müavini Bəşir Hacıyev APA-nın Ağdam şəhərinə ezam olunmuş müxbirinə açıqlamasında deyib ki, Ağdam şəhərində bir çox layihələr həyata keçirilir: “Bunlardan Bərdə-Ağdam, Ağcabədi-Ağdam, Füzuli-Ağdam yollarını qeyd etmək olar. Bununla yanaşı, Bərdə-Ağdam dəmir yolunda inşaat işləri sürətlə davam etdirilir. Bu layihənin artıq 90 faizi artıq icra olunub, ilin sonuna yekunlaşdırılması nəzərdə tutulur”.
Mayın 2-də Prezident İlham Əliyevin Ağdama səfəri zamanı burada ikinci və üçüncü yaşayış məhəllələrinin təməllərinin qoyulmasına diqqət çəkən Bəşir Hacıyev məhəllələrin tikintisinin yekunlaşdırılmasının 2025-ci ilin sonuna nəzərdə tutulduğunu deyib: “Ağdamda üçüncü yaşayış məhəlləsinin ərazisi 16,93 hektar əhatə edir. Burada 1, 2, 3 və 4 otaqdan ibarət 1239 mənzil tikilməsi nəzərdə tutulur. Eyni zamanda, Ağdamın ikinci yaşayış məhəlləsinin ərazisi 13,31 hektar təşkil edir”.
Dövlət başçısının səfəri zamanı Ağdam şəhərində inzibati binanın da təməlini qoyulduğunu qeyd edən Bəşir Hacıyev onun ümumi ərazisinin 2,12 hektar təşkil etdiyini deyib: “Binanın tikinti sahəsi 24 450 kvadrat metrdir. İnzibati binanın qarşısında park və meydança inşa olunacaq. Bildiyiniz kimi, Prezidentin səfəri zamanı Ağdam Muğam Mərkəzinin də təməli qoyulub. Muğam Mərkəzi bir zirzəmi və iki mərtəbədən ibarətdir. Burada sinif otaqları, rəqs təlimi otaqları, iclaslar üçün otaqlar, böyük konsertlər üçün zallar olacaq. Açıq havada amfiteatrın inşa olunması nəzərdə tutulub. Eyni zamanda, yerüstü dayanacağın da tikintisi planlaşdırılır. Muğam Mərkəzinin inşasının 2024-cü ilin sonunda yekunlaşması nəzərdə tutulur”.
Ağdam Elektrik Şəbəkəsinin mühəndisi İlqar Məmmədov isə bildirib ki, Rəqəmsal İdarəetmə Mərkəzi və Təlim-tədris kompleksinin yaradılmasında əsas məqsəd elektrik enerjisinin paylanmasında fasiləsizliyin, eyni zamanda etibarlılığının yüksək səviyyədə təmin olunmasıdır.
“Onu da qeyd etmək lazımdır ki, burada mühəndis texniki heyət üçün müasir avadanlıqlarla təchiz olunmuş iş otaqları, o cümlədən vətəndaşların qəbul üçün müvafiq şərait olacaq”, - deyə İlqar Məmmədov vurğulayıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
