İnfrastruktur

Ana səhifə

İnfrastruktur

“Baktelecom” internet və telefon xidmətləri üzrə gəlirini 7%-dən çox artırıb

14 aprel 2022 16:12 (UTC +04:00)

“Baktelecom” MMC-nin internet və telefon xidmətləri üzrə 2020-ci ildə əldə etdiyi gəlirin həcmi 2019-cu illə müqayisədə 7,3% artaraq 77 922 min manat təşkil edib. “APA-Economics” xəbər verir ki, bu barədə müəssisənin dərc etdiyi maliyyə hesabatında qeyd olunur.
Bildirilir ki, gəlirlərdəki artıma uyğun olaraq, maya dəyəri üzrə 2020 xərclərində də müvafiq artım müşahidə edilib.
Cəmiyyətin təsərrüfat fəaliyyətində əməliyyatların genişlənməsinə baxmayaraq, xərclərin düzgün idarəedilməsi nəticəsində ümumi, inzibati və digər əməliyyat xərcləri 2020-ci ildə 4% azalaraq 20 415 min manat təşkil edib.
Pandemiya və müharibə şəraiti ilə əlaqədar digər əməliyyat gəlirlərində isə kəskin azalma baş verib və əməliyyat fəaliyyəti üzrə mənfəətin 28% azalaraq 2 586 min manat təşkil etməsinə səbəb olub.
“Baktelecom”un vergidən öncəki mənfəəti 2020-ci ildə 2 412 min manat təşkil etsə də, mənfəət vergisi xərcinin kəskin artması ilə əlaqədar olaraq Cəmiyyət müşahidə edilən ili 13 712 min manat zərərlə başa vurub. Mənfəət vergisi xərcinin artımına səbəb təxirə salınmış vergi aktivinin silinməsi olub. Belə ki, audit prosesi davam etdirilən dövrdə məlum olub ki, Cəmiyyət yaxın gələcəkdə Rəqəmsal İnkişaf və Nəqliyyat Nazirliyinin tabeliyində olan digər quruma - Aztelekom MMC-yə birləşəcək.
Maliyyə Hesabatlarının Beynəlxalq Standartlarına görə, əgər Cəmiyyətin hüquqi olaraq ləğv edilməsi və fəaliyyətinin başqa bir müəssisəyə birləşərək davam etdirilməsi ilə bağlı aşkar bir məlumat varsa, yerli və beynəlxalq uçotda vergiyə görə yaranan müvəqqəti fərqlər (təxirə salınan vergi aktivi) birdəfəlik xərcə silinir və yeni yaranacaq müəssisənin beynəlxalq uçotunda nəzərə alınır. Bir sözlə, Cəmiyyətin beynəlxalq uçota əsasən 2020-ci ili zərərlə bitirməyinin səbəbi birbaşa onun təsərrüfat fəaliyyəti ilə deyil, qərara alınan strateji yeniliklərdən yaranan mövcud vəziyyət ilə əlaqədardır.