İnterpol xəttilə axtarılan azərbaycanlı açıqlama yayıb

İnterpol xəttilə axtarılan azərbaycanlı açıqlama yayıb
# 24 noyabr 2014 18:45 (UTC +04:00)

Bakı. Hafiz Heydərov-APA. “2012-ci ildə mənə Çexiyada təhsillə bağlı bir azərbaycanlı ailə müraciət etmişdi. Onlara yardım etdim, Praqa Karl Universitetinə 6500 avro təhsil haqqı ödədilər, lazım olan sənədləri göndərdik, ancaq onlar öhdələrinə düşən sənədləşməni düzgün aparmadıqları üçün viza ala bilmədilər. Bütün bu sənədlər və ödəmələr haqqındakı qəbzlər, sübutlar əlimizdədir. Bu işdə mənim günahım olmasa da, o adamlara öz cibimdən 3000 dollar pul qaytardım. Ancaq onlar məni Azərbaycan hüquq-mühafizə orqanlarına müraciət etməklə hədələdilər və daha çox maddi vəsait tələb etdilər”.

Bu barədə İnterpolun barəsində axtarış elan etdiyi Elşən Nəzərovdan APA-ya daxil olan açıqlamada bildirilib.

E. Nəzərov bu məsələni “kiçik problem” adlandırıb və deyib ki, həmin şəxslər məsələni siyasiləşdirmək istəyirlər.

O, 17 ildir ki, Çexiya Respublikasının rəsmi qoruması altında olduğunu da vurğulayıb: “Ümid edirəm ki, rəsmi Bakı da mənə şər atanları cəzalandıracaq. Şəxsən mən hər iki dövlətin müvafiq orqanları ilə əməkdaşlığa hazıram”.

Qeyd edək ki, bu gün APA Azər-Çex” Cəmiyyətinin sədri Elşən Nəzərovun beynəlxalq axtarışa verilməsi barədə xəbər yayıb. İnterpolun saytında yerləşdirlən məlumatda qeyd olunub ki, 40 yaşlı Elşən Nəzərov dələduzluqda təqsirli bilinir. Azərbaycan hüquq-mühafizə orqanları onun saxlanılması üçün İnterpola müraciət edib.

Azərbaycanın Diasporla İş üzrə Dövlət Komitəsindən isə bildirilib ki, qurum artıq bir neçə ildir Elşən Nəzərov adlı şəxslə bütün əlaqələri kəsib:“Onun fəaliyyəti ilə bağlı dəfələrlə Dövlət Komitəsinə də şikayət xarakterli müraciətlər daxil olub”.

#
#

ƏMƏLİYYAT İCRA OLUNUR