COP29 çərçivəsində “Uşaqların və gənclərin NDC 3.0 prosesinə məzmunlu cəlb olunması: irəliləyişlər və nailiyyətlər üzrə inventarlaşdırma” mövzusunda tədbir keçirilib.
APA xəbər verir ki, tədbirdə gənclərin NDC 3.0-ın (NDC - Milli Səviyyədə Müəyyən Edilmiş Töhfələr) nəzərdən keçirilməsi və həyata keçirilməsi prosesində məzmunlu iştirakını dəstəkləməyi hədəfləyən mövcud təcrübələr vurğulanıb. Tərəflərə uşaqların və gənclərin bütün NDC prosesinə (planlaşdırmadan icraya, izləmə və nəzərdən keçirmə prosesinə qədər) məzmunlu şəkildə cəlb olunmasına dəstək vermək üçün istifadə oluna biləcək alətlərin nümunələri təqdim edilib.
COP29-un Gənc İqlim Çempionu Leyla Həsənova bildirib ki, uşaqların və gənclərin milli və beynəlxalq səviyyədə, o cümlədən bəzi ölkələrdə artıq başlamış NDC 3.0 prosesində iqlim proseslərinə mənalı şəkildə cəlb edilməsi ölkələr üçün böyük əhəmiyyət və dəyər daşıyır: “COP28-də Global Stocktake mövcud vəziyyətimizi və qlobal temperaturu 1.5 dərəcə ilə məhdudlaşdırmaq üçün kollektiv hədəfimizə çatmaq sahəsində harada dayandığımızı qiymətləndirdi.
Şübhəsiz ki, istiqaməti düzəltməyə ehtiyac var. Təəssüf ki, zaman bizim xeyrimizə işləmir və bizi 1.5 dərəcə ilə uyğun bir trayektoriyaya qaytarmaq bütün cəmiyyətin yanaşmasını tələb edəcək, buna uşaqların və gənclərin mənalı iştirakı da daxildir”.
Leyla Həsənova NDC 3.0 prosesində uşaqların və gənclərin mənalı iştirakını dəstəkləmək üçün müxtəlif gənclər təşkilatları və hərəkatları tərəfindən liderlik edilən mövcud gənclər təşəbbüslərini minnətdarlıqla qeyd edib: “Mən onlarla birlikdə dayanaraq tam dəstək verməyə hazıram. NDC-nin nəzərdən keçirilməsi prosesi ölkələr üçün öz milli planlarında inklüziv və iddialı fəaliyyətləri ön plana çıxarmaq üçün mühüm bir fürsətdir.
Buna görə də, bütün hökumətləri uşaqların və gənclərin milli şərtlərinə və Paris Sazişindəki hədəflərinə uyğun şəkildə iqlim siyasətinə və fəaliyyətlərinə mənalı şəkildə cəlb edilə biləcəyi innovativ yollar tapmağa çağırıram. Bununla yanaşı, NDC prosesində gənclərin iştirakını məhdudlaşdıra biləcək müxtəlif reallıqları və amilləri nəzərə alan yanaşmaların qəbul edilməsi də vacibdir ki, mümkün olan bütün səviyyələrdə, o cümlədən uşaqlara xüsusi yanaşmalarla, həqiqətən gəncləri əhatə edən bir yanaşma təmin olunsun.
Gənclər qlobal əhalinin əhəmiyyətli bir hissəsini təşkil etsələr də, biz homojen bir qrup deyilik. Bu səbəbdən, təsirli və inklüziv olmaq üçün yanaşmalar bütün uşaqların və gənclərin müxtəlif perspektivlərini və həyat təcrübələrini nəzərə almalıdır. Gənclərin iştirakı COP29 Sədrliyinin əsas prioritetlərindən biridir. COP29-un Gənclərin İqlim üzrə Çempionu kimi, mən komandamla birlikdə gənclərin səslərini və prioritetlərini mümkün olan ən yüksək səviyyələrə çatdırmaq və dəstəkləməyə davam etməyə sadiqəm.
Və mən yalnız bu gün dinamik müzakirələr aparacağımıza deyil, həm də ədalətli, az emissiyalı və iqlimə dayanıqlı bir dünyaya keçidə töhfə vermək üçün bir-birimizin güclü tərəflərindən istifadə edərək konkret əməkdaşlıq yolları tapacağımıza ümid edirəm”.
Tədbirdə çıxış edən Milli Məclisin deputatı Nigar Məmmədova məsələ ilə bağlı Azərbaycanın təcrübəsindən danışıb: “Azərbaycan hökuməti UNICEF-in Uşaqlar, Gənclər və İqlim Fəaliyyəti üzrə Bəyannaməsini imzalayıb və uşaqları iqlim siyasətinin mərkəzinə qoymağa sadiq olduğunu bəyan edib. Bu bəyannamə inklüziv iqlim siyasətini, uşaqların və gənclərin liderlik etdiyi fəaliyyətləri sürətləndirmək üçün həm yerli, həm də qlobal səviyyədə həyata keçirilir.
Uşaqları iqlim dəyişiklikləri ilə bağlı siyasətlərin mərkəzinə qoymaq və onları iqlim dəyişikliklərinin təsirlərindən qorumaq üçün həll yollarına investisiya etmək vacibdir. Azərbaycanın bu bəyannaməni imzalaması uşaqları iqlim gündəminin mərkəzinə qoyan növbəti addımdır. Biz uşaqlar üçün əhəmiyyətli olan mövcud sistemləri, məsələn, təhsil, sosial müdafiə və səhiyyə sistemlərini gücləndirmək, iqlim dəyişikliklərinə uyğunlaşdırmaq üçün çalışmalıyıq”.
Deputat bildirib ki, məqsəd bu xidmətləri iqlim dəyişikliklərinə dayanıqlı və cavabdeh etməkdir.
Tədbir digər çıxışlarla davam edib.
Mirvari Əzizova
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
