Maliyyə

Ana səhifə

Maliyyə

Azərbaycanda uzunmüddətli kreditlər üstünlük təşkil edir

04 iyun 2009 09:07 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının məcmu kredit portfelinin 66,6%-i uzunmüddətli kreditlərin payına düşür. Azərbaycan Mərkəzi Bankından “APA-Economics”ə verilən məlumatına görə, 2009-cu il mayın 1-ə bankların ümumi kredit portfeli 6 278,4 mln. manat olub ki, bunun da 4 181,5 mln. manatı uzunmüddətli kreditlərdir.
Qeyd edək ki, ötən ilin müvafiq dövrü ilə müqayisədə ümumi kredit portfeli 20,4% artıb, o cümlədən qısamüddətli kredit qoyuluşlarında 14,3%, uzunmüddətli kredit qoyuluşlarında isə 23,6% artım müşahidə olunub. Nəticədə hesabat dövrü ərzində kredit qoyuluşlarının strukturunda uzunmüddətli kreditlərin xüsusi çəkisi 1,8 faiz bəndi artaraq mayın 1-ə 66,6% təşkil edib.
Eyni zamanda yeni verilmiş kreditlərin strukturunda uzunmüddətli kreditlərin xüsusi çəkisi bu dövrdə 39,5% təşkil edib. Yeni verilmiş uzunmüddətli kreditlərin həcmi 2009-cu ilin yanvar-aprel ayında ötən ilin müvafiq dövrü ilə müqayisədə 38,1% azalıb:

(mln. man.)

Yeni verilmiş kreditlər	Yanvar-aprel 2009	Yanvar-aprel 2008
Cəmi	2 381,8	3 008,8
Qısamüddətli	1 440,9	1 489,8
1 ayadək	79,9	237
1 aydan 3 aya qədər	169,2	224,2
3 aydan 6 aya qədər	196,6	240,5
6 aydan 9 aya qədər	220,1	218,2
9 aydan 1 ilə qədər	775,1	570
Uzunmüddətli	940,9	1 519
1 ildən 3 ilə qədər	804,6	1 324,4
3 ildən 5 ilə qədər	111,9	137,5
5 ildən 10 ilə qədər	23,2	39,7
10 ildən yuxarı	1,2	17,4

Mərkəzi Bankın hesablamalarına görə, cari ilin yanvar-apreldə qısamüddətli kredit qoyuluşunun 94,6%-ni banklar tərəfindən verilən kreditlər, 5,4%-ni isə qeyri-bank kredit təşkilatlarının kreditləri təşkil edib. O cümlədən, bank sisteminin qısamüddətli kredit qoyuluşunda Azərbaycan Beynəlxalq Bankının payı 33%, digər bankların payı isə 67% təşkil edir. Uzunmüddətli kredit qoyuluşunun 98,5%-ni banklar tərəfindən verilən kreditlər, 1,5%-ni isə qeyri-bank kredit təşkilatlarının kreditləri təşkil edir. Bank sisteminin uzunmüddətli kredit qoyuluşunda Beynəlxalq Bankın kreditlərinin payı 42,8%, digər bankların payı isə 57,2 %-dir.