Maliyyə

Ana səhifə

Maliyyə

BVF il ərzində Qafqaz və Orta Asiya regionunda iqtisadi artım tempinin azalacağını proqnozlaşdırır

05 iyun 2009 12:13 (UTC +04:00)

Bakı. Nicat Mustafayev – APA-Economics. Hazırda Qafqaz və Orta Asiya regionunda iqtisadi artım tempinin azalması müşahidə olunsa da, 2010-cu ildə bu regionda iqtisadiyyatın bərpası proqnozlaşdırılır. «APA-Economics»in məlumatına görə, bu barədə Beynəlxalq Valyuta Fondunun (BVF) Azərbaycandakı nümayəndəsi Koba Qvenetadze bildirib.

BVF rəsmisi, həmçinin, qeyd edib ki, ümumiyyətlə, böhran dövründə neft-qaz ixracatçı ölkələri neft və qazdan əldə olunan gəlirlərə görə elə də zərər çəkmir. Buna baxmayaraq, həmin ölkələrin də neft-qaz ixracatı azalır: «Bu ölkələr kifayət qədər maliyyə ehtiyatı toplayıb və toplanan vəsaitlər fiskal stimul kimi istifadə oluna bilər».

K. Qvenetadze onu da bildirib ki, cari il ərzində Qafqaz və Orta Asiya regionunda iqtisadi artım tempinin azalması proqnozlaşdırılır. Lakin artıq 2010-cu ildə bu regionda iqtisadiyyatın artım səviyyəsi təxminən 5% təşkil edəcək.

BVF rəsmisi, həmçinin, region ölkələrinin xarici borclarının artması ehtimalını da vurğulayıb: «Regionun digər ölkələri ilə müqayisədə, Azərbaycanın xarici borclarının səviyyəsi münasibdir. Regionun bəzi ölkələrinin isə hələ də donorlara ehtiyacı var».

Qafqaz və Orta Asiya regionunun maliyyə bazarından danışan K. Qvenetadze bildirib ki, bu regionda (Qazaxıstandan başqa) maliyyə bazarı bir o qədər də inkişaf etməyib, məhz buna görə maliyyə böhranını maliyyə bazarına ciddi təsir göstərməyib.

K. Qvenetadze onu da qeyd edib ki, Rusiyadan pul köçürmələri 2009-cu ildə azalır və bu amil Tacikistan və Qırğızıstan kimi ölkələrinə ciddi təsir edir. Belə ki, həmin ölkələr Rusiyanın pul köçürmələrindən asılıdır.