Maliyyə

Ana səhifə

Maliyyə

«Azərdəmiryolbank»ın avtolizinq xidmətinə başlayıb

08 iyun 2009 09:05 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) lizinq xidmətləri çərçivəsində iyun ayından fiziki və hüquqi şəxslərə avtomobillərin lizinq yolu yolu ilə satılmasına başlayıb.

Bankın baş ofisindən «APA-Economics»ə verilən məlumata görə, daxili qaydalara əsasən, «Azərdəmiryolbank» lizinqə yeni və işlənmiş avtomobilləri verir (5 ildən artıq istifadə edilməmiş).

Qeyd edək ki, qiyməti 10 min manatdan az olmayan avtomobillər 4 il müddətinə illik 21-24%-ə verilir. İlkin ödəniş avtomobilin qiymətinin 20%-dən az olmamalıdır. Həmçinin, ilkin ödənişdən və lizinq müddətindən asılı olaraq effektiv faiz dərəcəsi 6% və daha artıq olur.

Xatırladaq ki, avtomobili lizinqə 20 yaşı tamam olmuş əmək qabiliyyətli Azərbaycan vətəndaşları əldə edə bilərlər. Lakin lizinq ödənişinin son müddəti onların pensiya yaşını keçməməlidir.

Avtolizinq xidməti bankın «Əməliyyat», «Mərkəzi», «Nəsimi» və «Biləcəri» filialları vasitəsilə göstərilir.

Cari ilin iyun ayının 1-nə «Azərdəmiryolbank»ın lizinq əməliyyatlarının ümumi portfeli 3,3 mln. manat olub. Bank, həmçinin sənaye, ticarət, tibb avadanlığı və texnika lizinqi də həyata keçirir.

Xatırladaq ki, «Azərdəmiryolbank» SKB-nin 850-yə yaxın səhmdarı mövcuddur. Nizamnamə kapitalında «25%+1 səhm» payı Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Şirkətinə (FMO), 10% hüquqi şəxslərə, qalanı isə fiziki şəxslərə məxsusdur.

Bank 1989-cu ildə təsis edilib və hazırda respublika üzrə 29 filialı, 40 bankomatı və 240 POS-terminalı fəaliyyət göstərir.

Cari ilin aprelin 1-nə bankın aktivlərinin həcmi 213,029 mln. manat, depozit portfeli 56,923 mln. manat, kredit portfeli 157,354 mln. manat, məcmu kapitalı 38,538 mln. manat, o cümlədən nizamnamə kapitalı 13,400 mln. manat təşkil edib.