Maliyyə

Ana səhifə

Maliyyə

Azərbaycanın xarici ticarət dövriyyəsinin müsbət saldosu kəskin azalıb

22 iyun 2009 12:50 (UTC +04:00)

Bakı. Rəşad Süleymanov – APA-Economics. Cari ilin yanvar-may aylarında Azərbaycanın xarici ticarət dövriyyəsində 2 329 216,8 min ABŞ dolları məbləğində müsbət saldo yaranıb. Ötən ilin analoji beş aylıq göstəricisi ilə müqayisədə müsbət saldo 5,3 dəfə azalıb. Bu barədə «APA-Economics»ə Dövlət Gömrük Komitəsindən məlumat verilib.

Hesabat dövründə 120 ölkə ilə aparılmış ticarət əməliyyatlarının həcmi 6 853 258,8 min dollar olub. Bunun 4 591 237,8 min dolları ixrac, 2 262 021 min dolları isə idxal əməliyyatlarının payına düşüb. O cümlədən, 14 384,9 min dollar dəyərində 428,5 ton əmtəə dövlət, hökumət və beynəlxalq təşkilatların xətti ilə təmənnasız kömək, humanitar yük və texniki yardım kimi daxil olub.

İxrac əməliyyatlarının həcmi 2008-ci ilin müvafiq dövrünə nisbətən 69,12% artıb, idxal əməliyyatlarının həcmi isə 8,16% azalıb.

Müvəqqəti ixrac rejimində Azərbaycandan 49 407,6 min dollar dəyərində mal ixrac edilib, 148 377,8 min dollar dəyərində mal isə ölkəyə müvəqqəti idxal olunub.

İxracın strukturunda əsas yeri xam neft (78,63%), neft məhsulları (13,15%), bitki və heyvan mənşəli yağlar (1,14%), idxalda isə maşın və elektrik aparatları, avadanlıqlar, elektrotexniki avadanlıqlar və onların ehtiyat hissələri (34,91%), ərzaq məhsulları (12,62%) və nəqliyyat vasitələri və onların hissələri (11,91%) tutub.

Azərbaycanın ixracatında ilk üç yeri İtaliya (28,41%), ABŞ (10,15%), Fransa (9,63%), idxalda isə Rusiya (17,5%), Türkiyə (13,78%) və Almaniya (10,58%) tutub.

Qeyd edək ki, hesabat dövründə xarici ticarətlə 5 971 hüquqi və fiziki şəxs məşğul olub.