Maliyyə

Ana səhifə

Maliyyə

Dünya Bankı Azərbaycanın qiymətli kağızlar bazarı sahəsində yeni layihə həyata keçirəcək

24 iyun 2009 06:15 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsində (QKDK) Dünya Bankının (DB) maliyyə və özəl sektor üzrə əlaqələndiricisi Maykl Edvardsın rəhbərlik etdiyi nümayəndə heyəti ilə görüş keçirilib. Görüşdə Azərbaycanın qiymətli kağızlar bazarının hazırkı vəziyyəti və inkişaf perspektivləri, həmçinin bu sahədə əməkdaşlıq imkanları müzakirə olunub.

QKDK-dan «APA-Economics»ə verilən məlumata görə, Komitə sədri Rüfət Aslanlı görüş iştirakçılarına qiymətli kağızlar bazarının strateji inkişaf istiqamətlərinə dair geniş məlumat verərək, bu sahədə qanunvericilik bazasının təkmilləşdirilməsi, bazar infrastrukturunun inkişaf etdirilməsi və tələbin stimullaşdırılması, qiymətli kağızlar təklifinin genişləndirilməsi, həmçinin komitənin tənzimləyici potensialın gücləndirilməsi və maarifləndirmə tədbirlərinin həyata keçirilməsindən məlumat verib. R.Aslanlı həmçinin qeyd edilən sahələr üzrə bir sıra donor təşkilatlarla həyata keçirilən layihələr barəsində danışaraq, DB ilə potensial əməkdaşlıq layihəsinin konturlarını müzakirə edib və bu əməkdaşlıqdan səmərəli nəticələr əldə olunacağına ümid etdiyini bildirib.

Görüşdə həmçinin DB-nın texniki layihəsi çərçivəsində Azərbaycanda həyata keçirilməsi nəzərdə tutulan digər mövzular geniş müzakirə olub.

Dünya Bankının Avropa və Asiya ölkələri üzrə regional korporativ idarəetmə əlaqələndiricisi Süzan Rutlic öz növbəsində Azərbaycanda istehlakçıların hüquqlarının müdafiəsi sahəsində beynəlxalq təcrübənin Azərbaycanda tətbiqi perspektivlərindən söz açıb.

Görüşün nəticəsi olaraq, Azərbaycanda qiymətli kağızlar bazarının vahid ticarət arxitekturasının yaradılması və avtomatlaşdırılması, həmçinin komitənin institusional potensialının gücləndirilməsi istiqamətində DB ilə QKDK arasında birgə layihənin hazırlanması və həyata keçirilməsi məqsədəuyğun hesab edilib.