Maliyyə

Ana səhifə

Maliyyə

«Azər-Türk Bank» son bir ildə depozit portfelini 15% genişləndirib

06 oktyabr 2009 08:33 (UTC +04:00)

Bakı. Elnur Hüseynquluyev – APA-Economics. «Azər-Türk Bank» Səhmdar Kommersiya Bankının (SKB) aktivlərinin həcmi 2009-cu ilin oktyabr ayının 1-nə 49,706 mln. manat təşkil edib ki, bu da ötən ilin müvafiq dövrü ilə müqayisədə 18,3% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 5,4% azalaraq 26,334 mln. manata, o cümlədən istehlak kreditləri 26,1% artaraq 10,321 mln. manata çatıb. Bu müddət ərzində bankın depozit portfeli 15,3% genişlənərək 31,309 mln. manat, o cümlədən əhalidən cəlb edilmiş əmanətlərin həcmi 18,5% artaraq 13,902 mln. manat olub.

Həmçinin, bankın məcmu kapitalı 1,4% artaraq 11,811 mln. manat, o cümlədən nizamnamə kapitalı sabit qalaraq 10 mln. manat təşkil edib.

Qeyd edək ki, son bir il ərzində bankın ümumi gəlirləri 1,3% artaraq 5,481 mln. manat, xərcləri isə 22% artaraq 3,766 mln. manata çatıb. Nəticədə, bankın əldə etdiyi mənfəət 26% azalaraq 1,715 mln. manat olub.

Bundan başqa, bu müddət ərzində bank tərəfindən əlavə 1 bankomat və 13 POS-terminal quraşdırılıb. Bankın işçilərinin sayı isə 23,2% artaraq 101 nəfərə çatıb.

Xatırladaq ki, «Azər-Türk Bank» SKB 1995-ci ildən fəaliyyət göstərir. Bankın səhmdarları rolunda Türkiyənin «Ziraat Bankası» (46%), «Ziraat Bank İnternational AG» (4%) və «Aqrarkredit» bank olmayan kredit təşkilatı (46%), «Turan Bank» ASC (4%) çıxış edir. Hazırda bankın respublika üzrə 2 filialı, 4 bankomatı və 16 POS-terminalı fəaliyyət göstərir.