Maliyyə

Ana səhifə

Maliyyə

Azərbaycanda bankomat şəbəkəsi ilin əvvəlindən 7% genişlənib

07 oktyabr 2009 07:54 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya bankları tərəfindən quraşdırılan bankomatların (ATM) ümumi sayı 2009-cu ilin sentyabr ayının 1-nə 1 617 vahid təşkil edib. Azərbaycan Mərkəzi Bankından «APA-Economics»ə verilən məlumata görə, bu göstərici ötən ilin müvafiq dövrü ilə müqayisədə 175 bankomat və ya 12,1%, cari ilin əvvəlindən isə 102 bankomat və ya 6,7% çoxdur.

Sentyabrın 1-nə fəaliyyət göstərən bankomatların 915-i və ya 57%-i Bakıda, qalanı isə regionlarda quraşdırılıb. Qeyd edək ki, Bakı ilə regionlar arasında bankomatların sayına görə nisbət ilin əvvəlindəki səviyyədə qalıb, ötən ilin sentyabrın 1-nə isə Bakının payına bankomatların 60%-i düşüb. Ötən ilin əvvəlinə Bakının payına bankomatların 62%-ni düşdüyünü nəzərə alaraq demək olar ki, bankomat şəbəkəsinin regionları əhatə etməsi prosesi tədricən genişlənir. Bu da pensiya sisteminin modernləşməsi, yəni təqaüdlərin plastik kartlara ödənilməsi prosesi ilə birbaşa bağlıdır.