Maliyyə

Ana səhifə

Maliyyə

Ziyad Səmədzadə: «2010-cu il dövlət büdcəsinin müzakirəsi zamanı neftin qiymətinə yenidən baxılacaq»

07 oktyabr 2009 11:14 (UTC +04:00)

Bakı. Elnur Hüseynquluyev – APA-Economics. Azərbaycanın 2010-cu il dövlət büdcəsinin layihəsinin müzakirəsində neftin baza qiymətinin dəyişdirilməsi məsələsinə mütləq baxılacaq. «APA-Economics»in məlumatına görə, bunu Milli Məclisin iqtisadi siyasət komitəsinin sədri Ziyad Səmədzadə bildirib.

Z.Səmədzadənin sözlərinə görə, dünyada neftin qiyməti ilə daim müzakirələr aparılır: «Bu məsələyə 2010-cu il dövlət büdcəsinin müzakirəsi zamanı mütləq baxılmalıdır. Çünki neftin qiyməti bütövlükdə ölkənin iqtisadi inkişaf parametrlərinə təsir edir. Biz özümüzü sığortalamalıyıq, şişirdilmiş rəqəmlərlə özümümü sakitləşdirməməliyik».

Z.Səmədzadə bildirib ki, son bir il ərzində dünya bazarında neftin qiyməti üç dəfədən çox düşüb: «Gələcəkdə neftin qiymətinə təsirə edəcək amilləri təhlil etmək bir dövlətin işi deyil, çünki bu, həqiqətən böyük bir məsələdir. Dünya bazarında neftin qiymətinə həm ABŞ, Çin, Hindistan, eyni zamanda inkişaf edən ölkələrin neft istehlakı təsir edir. Bu baxımdan növbəti ilin büdcəsi ilə bağlı bu məsələ mütləq müzakirə ediləcək».

Xatırladaq ki, 2009-cu il dövlət büdcəsində neftin baza qiyməti 70 dollar/barel səviyyəsində nəzərdə tutulub, gələn ilki büdcəyə isə bu göstəricinin 45-50 dollar/barel səviyyəsində daxil edilməsi gözlənilir.