Maliyyə

Ana səhifə

Maliyyə

Qlobal maliyyə böhranının Azərbaycana təsiri mövzusunda dəyirmi masa keçirilib

04 mart 2010 11:46 (UTC +04:00)

Bakı. Elnur Elnur Hüseynquluyev - APA-Economics. Bu gün Bakıda İqtisadi Tədqiqatlar Mərkəzi (İTM) tərəfindən «Qlobal maliyyə böhranının Azərbaycana, xüsusən də biznes sektoruna təsirləri» mövzusuna həsr olunmuş dəyirmi masa keçirilib.

«APA-Economics»in məlumatına görə, tədbirdə İTM-in maliyyə böhranı ilə bağlı biznes subyektləri arasında keçirdiyi sorğunun nəticələri də açıqlanıb.

İTM-in İdarə Heyətinin sədri Qubad İbadoğlunun sözlərinə görə, 300 müəssisəyə göndərilən sorğunun 238-i cavablandırılıb, ümumiləşdirilib və təhlil olunub. Tədqiqata cəlb olunan respondentlərin 25%-ni xidmət sferasında, 17%-ni ticarətdə, 16%-ni maliyyə, bank və sığorta sistemində, 13%-ni emal sənayesində, 7%-ni tikintidə, 6%-ni rabitədə, 3%-ni kənd təsərrüfatında, 2%-ni isə mədən sənayesində fəaliyyət göstərən müəssisələr təşkil edib.

«Azərbaycanda bütün rəqiblərinizi nəzərə alaraq, sizcə, onların neçə faizi fəaliyyətini həyata keçirmək üçün dövlət strukturlarına və ya özəl agentliklərə rüşvət verir» sualına respondentlərin 36%-i «bilmirəm», 10,2%-i hamısı, 13,2%-i «80-100%-i», 8,2%-i «60-80%-i», 7,3%-i «40-60%-i», 9%-i «20-40%-i», 9%-i «20%-i», 6,9%-i isə «heç biri» cavabını veriblər.

Sorğu iştirakçılarının 80%-i qlobal maliyyə böhranının neqativ təsirini hiss etdiyini, 20%-i isə böhranın təsirinə məruz qalmadığını bildirib. Birinci cavabı seçənlərin 47,54%-i öz fəaliyyətlərində böhranın təsirini 2008-ci ildən, 52,46%-i isə 2009-cu ildən hiss etdiyini bəyan ediblər.

Sorğunun nəticələrinin şərhindən sonra Q.İbadoğlu deyib ki, maliyyə böhranının təsiri nəticəsində Azərbaycan «Holland xəstəliyi»ndən uzaqlaşa bilib. Belə ki, böhran nəticəsində «Holland xəstəliyi»nin iki mühüm effektinin (məsrəf və məzənnə effektləri) iqtisadiyyata mənfi təsirləri azalıb. Bu isə Azərbaycan iqtisadiyyatında yaxın müddətdə xəstəliyin əsas simptomlarının müşahidə olunmayacağı nəticəsini çıxarmağa əsas verir.

Q.İbadoğlunun sözlərinə görə, tədqiqatların nəticəsi göstərib ki, hələ bir çox Azərbaycan şirkətləri dövlət orqanlarına rüşvət verməkdən və qlobal maliyyə böhranının təsirindən əziyyət çəkirlər.

Tədbirdə İTM-in İdarə Heyətinin üzvü Rasim Hüseynov «Qlobal maliyyə böhranın Azərbaycanın makro-iqtisadiyyatına təsirləri» mövzusunda geniş təqdimatla çıxış edib. O, 2009-cu ili Azərbaycan iqtisadiyyatı üçün son 10 ilin ən çətin dövrü kimi qiymətləndirib. Əvvəlki 3 ildə müşahidə edilmiş orta illik 22%-lik iqtisadi artım sürəti 2009-cu ildə 9,3%-ə enib. R.Hüseynov tədbir iştirakçılarına böhranın ölkə iqtisadiyyatının digər sektorlarına təsirinin nəticələri ilə bağlı geniş məlumat verib.