Maliyyə

Ana səhifə

Maliyyə

Azərbaycan Dövlət Sosial Müdafiə Fondu əmək haqlarını leqallaşdırmağa çalışır

09 mart 2010 12:39 (UTC +04:00)

Bakı. Aynur Vəliyeva - APA-Economics. Azərbaycan Dövlət Sosial Müdafiə Fondu hazırda məcburi dövlət sosial sığorta haqlarının toplanması sahəsində olan məsələlərin həlli istiqamətində işlər aparır.

“APA-Economics”in məlumatına görə, fondun sədri Səlim Müslümov jurnalistlərə açıqlamasında qeyd edib ki, hazırda işləyən insanların tam qeydiyyata alınması, ikili mühasibat sisteminə qarşı mübarizənin gücləndirilməsi və əmək haqlarının leqallaşdırılması üzrə tədbirlər görür.

S.Müslümov həmçinin bildirib ki, pensiya sisteminin avtomatlaşdırılması nəticəsində daxili nəzarət ictimai nəzarətlə əvəzlənir və hər kəs şəxsi pensiyasının necə formalaşdığına özü nəzarət edə bilər: “Pensiya təyin olduğu zaman hər kəs özü nəzarət edib öz pensiyasının məbləğini görməli, bu prosesdə hər hansı sənədlər və yerli kiçik məmurlar rol oynamamalıdır. Bu proses avtomatlaşdırılmalı və Avropada istifadə edilən müasir pensiya sistemi tətbiq edilməlidir. İnsanların normal pensiya alması onların öz hesablarına nə qədər vəsait yığmasından asılıdır və bu istiqamətdə təbliğat işlərinin gücləndirilməsi vacibdir ki, insanlar hesablarına daha çox vəsait yığmağa çalışsınlar və öz əmək haqlarının leqallaşdırması istiqamətində tədbirlər görsünlər”.

DSMF sədrinin sözlərinə görə, hazırda özəl tibb müəssisələrində əmək haqlarının leqallığı sahəsində problemlər mövcuddur. Belə ki, ölkədə 100-dən çox özəl tibb müəssisəsi mövcuddur və yalnız dövlət payı olan Mərkəzi Klinik Xəstəxananın hesabatlarında işçilərin orta aylıq əmək haqqı 600 manat göstərilib, digər tibb müəssisələrində isə orta aylıq əmək haqqı cəmi 76-124 manat arasında göstərilir. Halbuki bu müəssisələr eyni qiymətlərlə xidmətlər göstərirlər.

Hazırda DSMF şadlıq evlərində, pərakəndə ticarət sahəsində, nəqliyyat sektorunda və özəl sektorun hakim mövqe tutduğu digər sahələrdə bu məsələlərlə bağlı araşdırmalar aparır: “Apardığımız təhlillər göstərir ki, real əmək haqqı ilə hesabatda göstərilən maaş arasında 5-6 dəfə fərq mövcuddur. Biz hazırda Vergilər Nazirliyi, Əmək və Əhalinin Sosial Müdafiəsi Nazirliyi ilə bu istiqamətdə birgə tədbirlər görürük”.