Maliyyə

Ana səhifə

Maliyyə

«DəmirBank» Avropanın iki maliyyə təşkilatından 4 mln. dollarlıq kredit cəlb edib

10 mart 2010 09:41 (UTC +04:00)

Bakı. Elnur Hüseynquluyev - APA-Economics. Azərbaycanın «DəmirBank» ASC Avropanın iki maliyyə təşkilatı ilə 4 mln. ABŞ dolları məbləğində vəsaitin cəlb olunması barədə müqavilələr imzalayıb.

Bankın baş ofisindən «APA-Economics»ə verilən məlumata görə, bunlardan biri «DəmirBank» və Belçikanın «İncofin Investment Management» mikromaliyyə fondunun təşkilatçılığı ilə «Volksvermogen» şirkəti arasında 1,5 mln. ABŞ dolları həcmində vəsaitin cəlb olunması barədə kredit müqaviləsidir. Digər müqavilə isə Lüksemburqun «Symbiotics SA Information» və «Consulting & Services» şirkətləri tərəfindən təşkil olunub. Müqavilə Lüksemburqun «Wallberq Invest» və Lixtenşteynin “EMF Microfinance Fund” şirkətlərindən 2,5 mln. ABŞ dolları həcmində vəsaitin cəlb olunmasını nəzərdə tutur.

Bankın İdarə Heyətinin sədr müavini Yusif Cabbarovun sözlərinə görə, bu müqavilələr üzrə ayrılan vəsaitlər mikro və kiçik sahibkarlığın maliyyələşdirilməsinə, eləcə də kənd təsərrüfatının kreditləşdirilməsinə yönəldiləcək. Hər iki kredit müqaviləsi iki il müddətinə imzalanıb və qeyd edilən sahələrin inkişafına kömək edəcək.

Xatırladaq ki, «DəmirBank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir. Cari ilin yanvar ayının 1-nə banklın aktivlərinin həcmi 266,034 mln. manat, depozit portfeli 95,247 mln. manat, kredit portfeli 198,989 mln. manat, məcmu kapitalı 46,587 mln. manat, o cümlədən nizamnamə kapitalı 18,400 mln. manat təşkil edib. Bankın hazırda 29 filialı, 47 bankomatı və 259 POS-terminalı mövcuddur.