Maliyyə

Ana səhifə

Maliyyə

Azərbaycan Asiya İnkişaf Bankının ayırdığı kreditlərin 16%-ni istifadə edib

11 mart 2010 09:21 (UTC +04:00)

Bakı. Nicat Mustafayev – APA-Economics. Bu ilin yanvar ayının 1-nə Azərbaycan Asiya İnkişaf Bankı (AİB) ilə əməkdaşlıq etdiyi dövr ərzində Bank tərəfindən ayrılmış ümumi məbləğin 16,3%-ni istifadə edib. «APA-Economics»in məlumatına görə, bu barədə Nazirlər Kabinetinin illik hesabatında qeyd olunub.

Hesabatda bildirilir ki, AİB-in Azərbaycanla əməkdaşlığa başladığı tarixdən etibarən 2010-cu il yanvarın 1-dək olan dövrdə 7 layihə üzrə ümumi məbləği 598,4 mln. ABŞ dolları həcmində 10 kredit sazişi imzalanıb, bunlardan bir layihənin icrası başa çatıb, qalan 6 layihənin icrası isə davam etdirilir. Başa çatan layihə üzrə istifadə edilmiş kreditin ümumi məbləği 20,8 mln. dollar olub, icrada olan layihərin ümumi həcmi isə 574,2 mln. dollar təşkil edir.

AİB-lə imzalanmış kredit sazişləri üzrə 2010-cu il yanvarın 1-nə istifadə olunmuş vəsaitlərin cəmi 97,39 mln. dollar olub. Bu isə Bank tərəfindən ayrılan ümumi məbləğin 16,3%-nə bərabərdir. İmzalanmış kredit sazişləri üzrə əsas borcların qaytarılmasının vaxtı hələ çatmayıb.

Hesabatda həmçinin qeyd olunur ki, AİB tərəfindən ayrılmış ümumi kreditdən 2009-cu ildə istifadə edilmiş məbləğ 53,99 mln. dollar olub.

Qeyd edək ki, Azərbaycan 1999-cu ildən AİB-in üzvüdür. Hazırda AİB-in Mərkəzi Asiya Regional İqtisadi Əməkdaşlıq Proqramı (CAREC) çərçivəsində Azərbaycanda Yevlax-Gəncə və Qazax-Gürcüstan sərhədi avtomobil yollarının reabilitasiya və genişləndirilməsi, Dəmir Yolu Ticarəti və Daşımalara Dəstək layihələri, habelə «Şəhər su təchizatı və kanalizasiya Layihəsi», «Elektrik enerjisinin ötürülməsi sisteminin yaxşılaşdırılması Layihəsi», Gəncə dairəvi avtomobil yolunun tikintisi və digər layihələr maliyyələşdirilir. Cari ilin yanvar ayı ərzində AİB tərəfindən Azərbaycanda əsas kapitala yönəldilmiş investisiyaların həcmi 1 616,3 min manat təşkil edib.